(Б1) Молитвенное

Бобанын хем Оолун, хем Айоз Духун адына. Аминь.

Харччынын дуасы

Ей Аллах, хайырлы ол бана, гюнакеря.

Ей Сааби Иисус Христос, Аллахин Оолу, Сенин Пекпак Ананын хем хепси айозларын дуаларыннан хайырла бизи. Аминь.

Шюкюр Сана, бизим Аллахымыз, шюкюр Сана.

Дуа Айоз Духа:

Ей Гёк Падишахы, Иилендириджи, хакикатын Духу, Ани херердяйсин хем хербир иши долдурэрсын, ииликлерин Хазнеси хем ёмюр Вереджиси, гел да ерлеш бизим ичимиздя, хем хертюрлю мындарлыклардан пакла бизи, хем, ей Ииликли, куртар бизим джаннарымызы.

Айоз Аллах, Айоз Куветли, Айоз Ёлюмсюз, хайырла бизи (3 керя).

Шюкюр Бобайа хем Оола хем Айоз Духа хем шинди, хем хожма, хем даймаларын даймаларына да. Аминь

Ей Джюмледянайоз Ючлю, хайырла бизи, Сааби, пакла бизим гюнахларымызы, Запчи, афет бизим динсизликлеримизи; Айоз, долаш хем алыштыр бизим куветсизликлеримизи, Сенин Адын ичин.

Ей Сааби, хайырла ( 3 керя).

Шюкюр Бобайа хем Оола, хем Айоз Духа хем шинди, хем хожма, хем даймаларын даймаларынада. Аминь.

Саабинин дуасы:

Ей Гёклердя Олан бизим Бобамыз! Ко айозлансын Сенин адын, ко гелсин Сенин Падишахлыын; ко олсун Сенин истедиин                                              хем ердя да ниджя гёктя. Хергюнкю екмеемизи бизя бу гюн вер; хем баашла бизя бизим борчларымызы, ниджя биз да                                                  баашлэрыз бизя борчлу оланнара; хем гирдирмя бизи денемейя, ама куртар бизи кётюдян.

Сабаа тропарляри:

Уйкудан калкып, ей Ииликли, Сана диз чёкериз хем ангеллерин тюркюсюню ююсек сеслян Сана чалэрыз: «Айоз, Айоз, Айозсун, ей Аллах, Аллахыдуудуранын дуаларыннан хайырла бизи».

Шюкюрь: Дёшектян хем уйкудан калдырдын бени, ей Сааби, беним аклымы шавкландыр, хем беним юрееми хем аазымы ач, ки чалаим Сана, ей Айоз Ючлю: « Айоз, АЙоз, Айозсун, ей Аллах, Аллахыдуудуранын дуаларыннан хайырла бизи»

Хеми шинди: Ансыздан Даава Кесиджи геледжек, да хербиринин ишлери ачыладжек, ама коркуйлан геджя йарысында чааралым: «Айоз, Айоз, Айозсун, ей, Аллах, Аллахыдуудуранын дуаларыннан хайырла бизи» .

Ей Сааби, хайырла (12 керя)

Дуа Джюмледян Айоз Учлюйя:

Ей Айоз Ючлю, уйкудан калкып, Сана шюкюр едерим, хем Сенин чок ииликлиин хем сабурлуун ичин юфкелянмедин бана, хайлаза хем гюнахкеря, хем йок етмедин бени беним динсизликлеримнян; ама адетиня гёря инсансевиджи олдун хем бени, дуйгусузлукта йатаны, калдырдын, ки сабаалайым хем метиннейим Сенин девлетини. Хем шинди да шавкландыр беним фикирими, ач беним аазымы, ки ююренейим Сенин сёзлериня хем аннайым Сенини  сымарламаларына, хем йапайым Сенини истедиини, хем юреемин ачык инанында метиннейим Сени, хем метедейим Сенин хептянайоз адыны, Бобанын хем Оолун, хем Айоз Духун, шинди хем хожма, хем даймаларын даймаларынада. Аминь.

Гелин башиилделим бизим Падишахымыза, Аллаха! Гелинь башиилделим хем дюшелим Христоса, бизим Падишахымыза, Аллаха! Гелинь Башиилделим хем дюшелим Кендиня Христоса, бизим Падишахымыза хем Аллахымыза!

50-джи псалом:

Ей Аллах, хайырла бени Сенин бююк хайырына гёря хем Сенин аджыйанныын чоклууна гёря пакла беним динсизлиими. Таа зеедя йыка бени беним динсизлиимдян хем беним гюнахымдан пакла бени; зеря беним динсизлиими бян билерим, хем беним гюнахым херкеря беним ёнюмдя. Сана Бириня гюнах еттим хем Сенин ёнюндя кётюлюк йаптым; ёля, ани сёзлериндя кусурсуз булунаджан хем енсейеджян, ачан Сян даава кеседжян. Зеря те, динсизликляр ичиндя башландым, хем гюнахлар ичиндя бени дуудурду беним анам. Зеря те, Сян хакикатлыы севдинь, Сенин арифлиин билинмяз хем шавклы оланнарыны ачтын бана. Иссоплан бана серпеджян, да пак оладжам; йыкайаджан бени, да каардан таа бийаз оладжам. Вереджян беним кулаама ишитмяя севинмяк хем шенник; севинджек услу кемикляр. Чевир Сенин юзюню беним гюнахларымдан хем хепси беним динсизликлерими пакла. Ей Аллах, пак юрек йарат бендя хем доору дух ениля беним карнымда. Атма бени Сенин юзюндян хем Сенин Айоз Духуну алма бендян. Чевир бана Сенин куртармак севинмелиини хем запчи духуннан куветлендир бени. Ююредирим динсизлери Сенини йолларыгна, хем гюнахкерляр да Сана дёнеджекляр. Куртар бени каннардан, ей Аллах, бенпим куртулмамын Аллахы; беним дилим Сенин доорулууна севинеджек. Ей Сааби, беним дудакларымы ачаджан, да беним аазым Сенин метинниини хаберлейеджек. Зеря еер истяйдин курбан, вереджейдим: бютюнйакмаклары истемязсин. Аллаха курбан – пишманны дух; пишманны хем услу юряя Аллах алчаклатмаз. Ей, Сааби, Сенин хайырыннан мутлу йап Сиону, хем ко Иерусалимин да дувалары дюзюлсюнняр. Озаман ииликтя буйураджан хакикатын курбаныны, калдырылмышы хем бютюнйакмалары; озаман койаджаклар Сенин курбан софрана бузаалары.

Инанын Символу

Инанэрым бир Аллаха, Бобайа Джюмненин Запчисына, гёкю хем ери хепси гёрюненнери хем гёрюнмейеннери Йарадыджыйа. Хем бир Саабийя, Иисус Христоса, Аллахын Бирдуумуш Оолуна, Ани Бобайлан дууду хепси даймалардан илери; Айдынныктан Айдыннаа, хакикат Аллахтан хакикат Аллаха, дуумуша, ама диил йарадылмыша, Бобайлан Биролушлуйа, Ангысыннын себепиннян хепси олду. Ани бизимичин, инсаннар ичин гёклердян инди хем Айоз Духтан хем Марийа Кыздан тенненди, хем адам олду. Хем Ани бизим ичин Ставроза герилди Понтий Пилатын вакыдында, хем зеет чекти, хем гёмюлдю. Хем Ани йазылара гёря ючюнджю гюню дирилди. Хем Ани гюклеря чыкты, хем Ани отурэр Бобанын саа тарафында. Хем Ани салтанатлан геня геледзжек даава кесмяя дирилеря хем ёлюлеря, хем ки Онун Падишахлыынин битктси олмайаджек. Хем Айоз Духа, Саабийя, Ёмюрвереджийя, Ани Боьбайлан чыкэр, Ани Бобайлан хем Ооллан барабар башиилтмяк кабледеер хем салтанатланэр, Ани сёлярди пророклардан (ашыры). Бир Айоз,Дернекли хем Апостоллу Клисейя. Ачык инанедерим бир ваатизлии гюнахларын аф олмасы ичин. Беклеерим ёлюлерин дирильмеклерини хем геледжек дюнненин ёмюрюню. Аминь.

1-джи дуа, айоз бююк Макаринин

Ей, Аллах, пакла бени, гюнахкери, зеря хич бирзаман да йапмадым Сенин ёнюндя иилик; ама куртар бени кётюдян, хем ко олсун бендя Сенин истедиин, ки маанасыз ачайым йакышыксыз беним аазымы хем метиннейим Сенин айоз адыны, Бобанын хем Оолун хем Айоз Духун, шинди хем хожма, хем даймаоарын даймаларынада. Аминь.

2-джи дуа, хеп о айозун

Уйкудан калкып, геджя йарысы тюркюсюню гетирерим Сана, Куртарыджым, хем, айакларына дюшеряк, ююск сеседерим Сана: бракма бени уйуйайым гюнах ёлюмюннян, ама аджы бени Сян, Ани Кендин гиттин герильмейя, хем тездя калдыр бени, хайлазлыкта йатаны, хем куртар бени, Сенин ёнюндя дуада дураны, хем геджя уйкусундан сора айдыннат бана гюнахсыз гюню, ей Христос Аллах, хем куртар бени.

3-джю дуа, хеп о айозун

Сана, Инсансевян Запчи, уйкудан калкып алатлэрым хем Сенин аджыйанныыннан чалышэрым Сана йакышыклы ишлеря, хем Сана дуа едерим: йардым ет бана хервакыт, хербир иштя, хем куртар бени дюнненин хербир кётю ишиндян хем шейтанын истемесиндян, хем куртар бени, хем гирдир Сенин даймалы Падишахлыына. Зеря Сянсин беним Йарадыджым хем хербир ииляя Мукайетсын хем Вериджисийсин, хем Сана беним бютюн умудум, хем Сана шюкюр йоллээрым шинди хем хожма хем даймаларын даймаларына да. Аминь.

4-джю дуа, хеп о айозун

Ей Сааби, Сян, Ани Сенин чок ииликлииня хем бююк аджыйанныына гёря, вердин бана, Сенин изметкериня, хербир кётю душмандан беласыз гечирмяя бу гедженин гечмиш вакыдыны. Сян Кендин, ей Запчи, Джюмня Йарадыджысы, йакышыкта бени Сенин аслы шафкыннан хем айдынныклы юректян йапмаа Сенин истедиин шинди хем хожма, хем даймаларын даймаларынада. Аминь.

5-джи дуа, айоз Бююк Василийин

Ей, Джюмня Запчисы Сааби, гююдесиз куветлерин хем хербир тенин Аллахы, Ани йукардакыларда йашээрсын, хем ашаадакылара бакэрсын, Ани юреклери хем ич дуйгуларыны денеерсин хем инсаннарын саклыларыны ачык билерсин, Башлантысыз хем Даймалы Шафк, Ангысында йок диишилмяк, не да днмяк нышаны; Кендин, ей Ёлюмсюз Падишах, каблет бизим дуаларымызы, ангыларыны биз, кыйышмаклан имит едеряк Сенин аджыйанныынын чоклууна, бу вакыт кётю дудаклардан Сана гетиреериз, хем афет бизя бизим гюнахларымызы, ани йаптык ишлян, хем лафлан, фикирлян, билмяклян йада билмемяклян; хем пакла бизи хербир тен хем джан мындарлыындан. Хем вер бизя кушку юреклян хем фикир айдынныклыыннан бютюн бу йашамак геджесини гечирмяя, беклейеряк Сенин Бирдуумуш Оолунун, бизим Саабимизин хем Аллахымызын, хем Куртарыджымызын, Иисус Христосун шафклы гелян гюнюню, ачан О, хепсиня даава Кесиджи, салтанатлан геледжек еря хепсиня ишлериня гёря вермяя, булмасын бизи дюшкюн хем хайлазлыкта, ама кушку хем айакта, таманнайарак Онун сымарламаларыны , хем хазыр гирмяя Онуннансевинмеляя хем аллахлы салтанат падишах евиня, нередя севиненнерин вазгечмяз сеси хем Сенин юзюнюн йаздырылмаз гёзеллиини гёреннерин сёленмяз раатлыы. Зеря Сянсин аслы Айдыннык, Ани хепсинип айдыннадэрсын хем айозлээрсын, хем Сени бютюн йаратмак метиннеер жаймаларын даймаларынада. Аминь.

6-джы дуа, хеп о айозун

Иисёзлеериз Сени, Йукардакы Аллахы хем хайырлы Сааби, Ани херзаман йапэрсын бизимнян бююк хем танынмаз, кяямил хем коркулу сайысыз ишляр, Ани вердин бизя уйку бизим куветсизлиимизин раатлыы ичин хем чок чалышан гююдемизин ишлердян динненмеси ичин. Шюкюр едеериз Сана, зеря кайбетмедин бизи бизим динсизликлеримизлян, ама адетиня гёря инсансевян олдун хем дуйгусузлукта йатаннары калдырдын бизи, Сенин девлетини метиннемяя дейни. Бунун ичин йалварэрыз Сенин ёлчюсюз иилииня: айдыннат бизим аклымызы, гёзлеримизи хем бизим фикиримизи аар гамсызлык уйкусундан калдыр; ач бизим аазларымызы хем долдур оннары Сана метинниклян, ки биз куветли олалым далгасыз чалмаа, мкетиннемяя хем салтанатламаа Сени, хепсиндя хем хепсиндян салтанатланан Аллахы, Башлантысыз Бобайы Сенин Бирдуумуш Оолуннан хем Джюмнедянайоз хем Ии, хем Ёмюрверян Сенин Духуннан барабар, шинди хем хожма, хем даймаларын даймаларынада. Аминь.

7-джи дуа, Панаийа Аллахыдуудурана

Метиннерим Сенин ииликвермени, Запчийка, йалварэрым Сана, беним аклымы йап ииликли. Ююрет бени доору гезмяя Христосун сымарламаларынын йолунда. Каавля бени кушку олмаа чалгыда, сыклет уйкусуну коолайарак. Йанылмак баалантыларыннан баалы оланы, Сенин йалвармакларыннан бошандыр бени, Аллахлыгелин. Геджя-гюндюз кору бени, зеетлейян душманнардан куртарарак. Ей, Ёмюрверян Аллахы дуудуран, гюнахлы зеетленмеклярлян ёлдюрюлмюшю, дирильт бени. Диил авшам Шафкыны дуудуран, беним кёр олан джанымы шафкландыр. Ей, Запчинын шашмаклы падишах ичери, Айоз Духун Аллахлы еви йап бени. Ей, Имдатчыйы дуудуран, беним джанымын чок йыллык гюнахлы зеетленмеклерини алыштыр. Йашамак боранынын далгаларында саллананы бени пишманнык йолуна доорут. Куртар бени даймалы атештян, кётю курттан хем джендемдян. Гюнахларын чойунда кабаатлы олан, олмайым бян шейтаннара севинмелик. Ей Хептянлекесиз, беллисиз гюнахларлан ихтийар оланы, бени ениля. Бир да зееттян пай алмайан гёстер бени хем хепсинин Запчисына йалвар. Гёк севинмелииндя кепси айозларлан йакышыкла бени пай алмаа. Пекайоз Кыз, ишит Сенин йарамаз изметкеринин сесини. Ей, Джюмнедянпак, беним джанымын мындарлыыны паклайан йаш акмасыны вер бана, Пекпак. Юректян йалвармаклары Сана гетирерим дурмаксыз, Запчийка, саваш. Дуа изметими каблет хем ииюрекли Аллаха гётюр. Ангеллердян таа ююсек Олан, дюння карышмалыындан таа йукары калдыр бени. Айдынныклы гёк Еви, духлу ииликвермейи бендя доорут. Еллерими хем аазымы ююселдеерим метиннемяя дейни, амак мындарлыклан мындарлыы, ей, Хептянлекесиз. Джан кайбедян айыплардан куртар бени, чалышмаклан йалварарак Христоса, Ангысына хатыр хем башиилтмяк дюшер шинди хем хожма, хем даймаларын даймаларынада. Аминь.

8-джи дуа, бизим Саабимизя Иисус Христоса

Чок хайырлы хем Хептянхайырлы беним Аллахым, ей, Сааби Иисус Христос, Ани чок севгилииня гёря индин хем теннендин, хепсини куртармаа дейни, хем геня, Куртарыджы, йалварэрым Сана: куртар бени ииликверменя гёря; зеря еер ишлеримя гёря куртарарсан бени, бу олмайаджек ииликвермяк хем баашыш, ама таа чок ляязымлык. Ей, аджыйанныкта зенгин хем хайырлыкта йаздырылмаз! Сян дедин, беним Христосум: «Бана инанан йашайаджек хем ёлюм хич гёрмейеджек!» Еер Сана инанмак куртарарса умутсузлары, те бян инанэрым, куртар бени, зеря беним Аллахым хем Куртарыджымсын Сян. Ко ишлерин ериня инан сайылсын бана, беним Аллахым, зеря булмайаджан бени доору гёстерян иш. Ама ко хепси оннарын ериня беним бу инаным такман олсун, о джувап етсин, о бени доору гёстерсин, о йапсын бени пай алан Сенин даймалы салтанатында. Хем капмасын бени шейтан, хем севинмесин, ани айырды бени Сенин, Аллахын Сёзю, елиндян хем аулундан. Ама, истярсям йада истямярсам, куртар бени, ей Христос беним Куртарыджым, тездя гель бана йардыма, ёлерим; зеря таа беним анамын карнысындан беним Аллахымсын Сян. Йакышыкла бени, ей Сааби, шинди севейим Сени, ниджя севдийдим озаман те о гюнахы, хем геня хем геня юшенмексиз, уйгун измет едейим Сана, ниджя таа илери истедийдим шейтана – йаланджыйа. Таа зеедя измет едеджям Сана, Саабимя хем беним Аллахыма Иисус Христоса, хепси беним ёмюрюммюн гюннериндя, шинди хем хожма, хем даймаларын даймаларына да. Аминь.

9-джу Дуа айоз коруйуджу Ангела

Ей, айоз ангел, ани койулдун корумаа беним мутсуз джанымы хем гюнахларда зеетленян йашамамы, бракма бени, гюнахкери, хем узакланма бендян, беним запсызлыым ичин. Бракма кётю шейтана куллансын бени бу ёлюмню гююдеми зеетлемяклян; каавиля беним мутсуз хем йуфка елими хем чыкар бени куртулуш йолуна. Ей Аллахын айоз ангели, беним йоксул джанымын хем гююдемин кооруйуджусу хем ёртюджюсю, хепсини афеть бана, нейлян бян гюджендирдим сени бютюн йашамамын гюннериндя, хем, еер гюнах еттийсям гечмиш бу геджедя, аркала бении бююнкю гюндя, хем хербир душман денемесиндян кору бени, ки бир да гюнахлан гюджендирмейим Аллахы, хем дуа ет беним ичин Саабийя, каавилесинь бени Кенди коркусунда хем гюстерсин бени Кенди иилииня йакышыклы измекяр. Амин.

10-джу дуа, Панаийа Аллахыдуудурана

Пекайоз беним Запчикайм, Аллахыдуудуран, Сенин айоз хем хептянкаави дуаларыннан коола бендян, алчаклы хем мутсуз Сенин изметкериндян, дарсыклыы, унутмайы, акылсызлыы, чалышмазлыы хем хепси мындар, фена хем кётю фикирлери беним йоксул юреемдян хем каранныклы аклымдан, хем сюндюр беним гюнахлы зеетленмеклеримин атешини, зеря факирим хем мутсузум бян. Хем куртар бени кайыба гётюрян чок акыла гетирмеклердян хем истемеклердян, хем хепси кётю ишлердян бошандыр бени, зеря иисёзлюйсюн хепси сойлардан, хем салтанатлэр Сенин чок хатырлы адын даймаларын даймаларынада. Аминь

Дуа данышы айоза, ангысынын адыны ташыйэрсын

Дуа ет беним ичин Аллаха, айоз (ады), зеря бян шинди зааметлян Сана гелерим, тездя уардымджыйа хем беним джаным ичин дуаджыйа.

Панаийа Аллахыдуудурана селям тюркюсю

Ей, Аллахыдуудуран Кыз, севин, Берекетли Олан Мария, Сааби Сениннян; иисёзлюйюн Сян карыларын арасында, хем иисёзлюйдюр Сенин карнынын Мейвасы, зеря дуудурдун бизим джаннарымызын Куртарыджысыны.

Тропарь Ставроза хем ватан ичин дуа

Ей Сааби, куртар Сенин инсаннарыны хем иисёзля Сенин варлыыны, душманнарын юстюня енсемяк баашлайарак хем Сенин Ставрозуннан бизи коруйарак.

Саалар ичин дуа

Ей Сааби, куртар хем хайырла беним айозлу бобамы (ады) хем онун айоз дуаларыннан афет беним гюнахларымы. Ей Сааби, куртар хем хайырла беним анамы бобамы (адлары), кардашларымы, хем кызкардашларымызы хем хепси сенселемя йакын оланнары, заабитлик еденнери, ююредиджилери, иилик йапаннары (адлары) хем хепси доорусалтанатлы христианнары

Рааметлиляр ичин дуа

Ей Сааби, раатландыр Сенин изметкерлеринин джаннарыны: анамын-бобамын, сойларымын хем хепси беним йакындакыларымы (адлары) хем афеть оннара хербир истенян хем истянмеян гюнахларыны, баашлайарак оннара Гёктеки Падишахлыы хем даймалы ииликлердян пай алмак

Метинни тюркю Панаийа Аллахыдуудурана

Хакына уйер мутлуламаа Сени, Даймамутлу хем Хептянлекесиз Аллахыдуудуран хем бизим Аллахымызын Анасыны. Ани Херувимлердян таа хатырлыйсын, хем Серафимлердян бензетметсиз таа салтанатлыйсын, Ани бозулмаксыз Аллахы Сёзю дуудурдун, Сени аслы Аллахыдуудураны, бююклеериз

Шюкюр хем шинди: Ей Сааби хайырла (3 керя)

Ей Сааби, Иисус Христос, Аллахын Оолу, Сенин Пекпак Ананын, Аллаха бензейян хем Аллахлы ташыйан бизим бобаларымызын хем хепси айозларын дуаларыннан хайырла бени