"ГАГАУЗИЯ ПРАВОСЛАВНАЯ". Церковный сайт из Конгаза

(Б1) Молитвенное

1.Бобанын хем Оолун, хем Айоз Духун адына. Аминь.

2.Ей Сааби Иисус Христос, Аллахин Оолу, Сенин Пекпак Ананын хем хепси айозларын дуаларыннан хайырла бизи. Аминь.

3.Шюкюр Сана, бизим Аллахымыз, шюкюр Сана.

4.Ей Гёк Падишахы, Иилендириджи, хакикатын Духу, Ани херердяйсин хем хербир иши долдурэрсын, ииликлерин Хазнеси хем ёмюр Вереджиси, гел да ерлеш бизим ичимиздя, хем хертюрлю мындарлыклардан пакла бизи, хем, ей Ииликли, куртар бизим джаннарымызы.

5.Айоз Аллах, Айоз Куветли, Айоз Ёлюмсюз, хайырла бизи (3 керя).

6.Шюкюр Бобайа хем Оола хем Айоз Духа хем шинди, хем хожма, хем даймаларын даймаларынада. Аминь

7.Ей Джюмледянайоз Ючлю, хайырла бизи, Сааби, пакла бизим гюнахларымызы, Запчи, афет бизим динсизликлеримизи; Айоз, долаш хем алыштыр бизим куветсизликлеримизи, Сенин Адын ичин.

8.Ей Сааби, хайырла ( 3 керя).

9.Шюкюр Бобайа хем Оола, хем Айоз Духа хем шинди, хем хожма, хем даймаларын даймаларынада. Аминь.

10.Ей Гёклердя Олан бизим Бобамыз! Ко айозлансын Сенин адын, ко гелсин Сенин Падишахлыын; ко олсун Сенин истедиин хам ердя да ниджя гёктя. Хергюнкю екмеемизи бизя бу гюн вер; хем баашла бизя бизим борчларымызы, ниджя биз да баашлэрыз бизя борчлу оланнара; хем гирдирмя бизи денемейя, ама куртар бизи кётюдян.

Авшам тропарляри

Хайырла бизи, ей Сааби, хайырла бизи, зеря бир да джувап булмайарак, бу дуайы Сана, ниджя Запчыйа, гюнахкерляр гетирериз: «Хайырла бизи!»

Шюкюр: Ей Сааби, хайырла бизи, зеря Сана умутланэрыз, пек Юфкеленмя бизя, хем анма бизим динсизликлеримизи, ама шинди да бак , Ииюреклигиби, хем куртар бизи бизим душманнарымыздан, зеря Сянсин бизим Аллахымыз, биз да Сенин инсаннарын, хепсимиз – Сенин еллеринин йаратмалары, хем Сенин адыны чаарэрыз.

Хем шинди: Хийырлыын капуларыны ач бизя, иисёзлю Аллахыдуудуран, ки Сана умут еденняр, кайбелмейелим, ама Сениннян куртулалым кахырлардан, зеря Сянсин христианнарын куртулмасы

Ей Сааби, хайырла (12 керя)

1-джи дуа, айоз Бююк Макаринин, Аллаа Бобайа

Ей, даймалы Аллах хем хербир йаратманын Падишахы, ани йакышыкладын бени таа бу саадада етишейим, афеть бана гюнахларымы, ани йаптым бу гюн ишлян, лафлан хем фикирлян, хем пакла, ей Сааби, бен6им алчаклы джанымы хербир гююдя хем джан мындарлыкларындан. Хем вер бана, ей, Сааби, бу геджя уйкуйу раатлыкта гечирмяя, ки, дёшеемдян калкып, ии хатыр гюдейим Сенин пекайоз адына беним ёмюрюмюн хер бир гюнюндя хем енсейим беним юстюмя калкынан тенни хем тенсиз душманнары. Хем куртар бени , ей, Сааби, бош дюшюнмеклердян хем бени мындарлайан кётю истемеклердян. Зеря Сениндир падишахлык хем кувет, хем салтанат, Бобанын хем Оолун, хем Айоз Духун, шинди хем хожма, хем даймаларын даймаларынада. Аминь.

 

2-джи дуа, айоз Антонинин, бизим Саабимизя Иисус Христоса

Ей, Джюмня Запчисы, Бобанын Сёзю, Иисус Христос, Кендин бютюн оларак, бююк аджыйанныына гёря биркеря биля айыртма бендян, Сенин изметкериндян, ама хервакыт ол бендя. Ей, Иисус, Сенин койуннарынын ии гюдюджюсю, вермя бени йылан кайрышмасына хем шейтанын истедииня бракма бени, зеря ёлюм тоому бендя вар. Ама Сян, ей, Сааби, Аллах, хепсиндян башиилтмяк кабледян Айоз Падишах, Иисус Христос, уйку вакыдында кору бени сюнмяз шавкыннан, ангысыннан Сенин ююрениджилерини айозладын. Вер, ей, Сааби, бана да, Сенин йакышыксыз изметкериня, Сенин куртулушуну беним дёшеемдя: айдыннат беним ак4лымы Сенин айоз Евангелийа аннамасы шафкыннан, джанымы – Сенин Ставрозуна севгийлян, юрееми – Сенин сёзюнюн паклыыннан , гююдеми – Сенин хавезленмексиз зеетчекмяннян, беним фикирими Сенин Сенин услулууннан кору хем дюшян вакытта калдыр бени салтанатламаа Сени. Зеря пек салтанатлыйсын Башлантысыз Бобанын хем Джюмнедянайоз Духуннан барабар даймаларадак. Аминь.

3-джю дуа, Джюмнедянайоз Духа

Ей Сааби, Гёк Падишахы, Иилендириди, Хакикатын Духу, аджы хем хайырла бени, Сенин гюнахкер изметкерини, хем брак бана, йакышыксыза, хем афет хепсини, не гюнах йаптым бу гюн Сенин ёнюндя ниджя инсан, хем таа чок, диил саде ниджя инсан, хем хайвандан да таа бетер, истенян хем истянмейян, билинян хем билинмяз беним гюнахларымы; оннары, ани генчликтян хем кётю табеетлердян, зхем ани сертликтян хем дарсыклыктан йаптым. Еер Сенин адыннан емин еттийсам йада кётюледийсам ону беним аклымда; йада биркимсейи азарладыйсам, йада биркимсейя юфкемдя лаф чыкардыйсам, йада гюджендирдийсам, йада бишейдян сертлендийсам; йада йаландырдыйсам, йада зеедя уйудуйсам, йада бана гелян фукааралары чевирдийсям; йада кардашымы гюджендирдийсям, йада кавга йаптыйсам, йада биркимсейя маана булдуйсам, йада кендими бююклендирдийсам, йада диклендийсам, йада юфкелендийсам; йада дуада дураркан, дюння ишлериндя фикирими гездирдийсам, йада айыплык дюшюндюйсям; йада чок идийсям, йада сарфош олдуйсам, йада акылсыз гюлдюйсям; йада кётюлюкдюшюндюйсямйада аалемин гёзеллиини гёрюпюреемдя онуннан йараландыйсам; йада айып лафеттийсям, йада кардашымын гюнахына гюлдюйсям, беним са кенди гюнахларым сайысыз; йада дуа ичин чаляшмадыйсам, йада таа башка да кётюлюк йаптыйсам, тутмэрым аклымда, зере буннары хем таа чок буннардан йаптым. Хайырла бени, Йарадыджым беним, ей, Запчи, дарсыклы хем йакышыксыз Сенини изметкерини хем брак, хем колвер бана, хем афеть бени Ии хем Инсансевян гиби, ки раатлыкта йатайим, уйуйайим, хем динненнейим бян, хайырсыз, гюнахкер хем мутсуз, хем башиилдейим, хем метиннейим, хем салтанатлайим чок хатырлы Сенин адыны хем Бобанын, хем Бирдуумуш Онун Оолунун шинди хем хожма, хем даймаларада. Аминь.

4-джю дуа, айоз Бююк Макаринин

Не гетиреджям Сана йада не вереджям Сана, вергилярлян зенгин ёлюмсюз Падишах, аджыйан хем инсансевян Сааби, Ани бени , Сана измет етмяя хайлазланы хем бишей ииликйапмайаны, гетирдим бу гечмиш гюнюн биткисинядан, дёнмейя хем куртулмайа беним джанымы доорударак? Хайырлы ол бана, гюнахкеря, хем бир да иилик йапмайана, калдыр беним дюшкюн джанымы, ани ёлчюсюз гюнахларда мындарланды, хем узакландыр бендян бу гёрюнян йашаманын хепси кётю дюшюнмеклерини. Бир Гюнахсыз, афет беним гюнахларымы, ани Сенин ёнюндя йаптым бу гюн билмяклян хем билмемяклян, лафлан, хем ишлян, хем дюшюнмякляня. Хем хепси беним дуйгуларымнан. Сян Кендин кору бени хербир душман калкынмасындан, Сенин аллахлы девлет кувединнян хем йаздырылмаз инсансевмяннян, хем кувединнен ёртеряк. Пакла, ей Аллах, пакла беним гюнахларымын чоклууну. Ей Сааби, ии истедииннян чыкар бени кётюнюн кементиндян, хем куртар беним гюнахтан зеетленян джанымы, хем шафкландыр бени Сенин юзюнюн шафкыннан, ачан геледжян салтанатта, хем шинди вер бана маанасыз уйуклэйим, хем неет гютмесиз хем карышмаксыз Сенин изметкеринин дюшюнмеклерини кору, хем хербир шейтан ишини коола бендян, хем айдыннат беним юреемин гёзлерини, ки уйумэйим ёлюм Уйкусуннан. Хем йолла бана гююдемя хем джаныма коруджуйу хем ююредиджийи селемет ангелини, куртарсын бени беним душманнарымдан, ки калкып беним дёшеемдян, гетирейим Сана шюкюр етмяк дуаларыны.Ей Сааби, ишит бени, гшюнахкер хем истедииннан хем есабыннан йоксул Сенин изметкерини. Вер бана, уйкудан калкып, Сенин лафларына ююренейим хем Сенин ангеллериннян шейтандан дарсыклыы бендян узаа коола, ки иисёзлейим Сенин айоз адыны, хем селтанатлайым, хем метиннейим Пекпак Аллахыдуудуран Марийайы, Ангысыны вердин бизя, гюнахкерлеря, корумак , хем каблет бизим ичин дуа единин Онун дуасыны; зеря билерис, ани Сенин гиби инсансевян хем дурмаксыз дуа едер. Онун аркаламасыннан, хем Айоз Ставрозу нышаннамаклан, хем хепси Сенин айозларыны дуаларыннан, беним йоксул джанымы кору, Иисус Христос, бизим Аллахымыз, зеря айозсун хем пек салтанатлыйсын даймаларада. Аминь.

5-джи дуа

Ей Сааби, бизим Аллахымыз, хепсини, не гюнах йаптым бу гюн лафлан, ишлян хем дюшюнмяклян, Ии хем Инсакнсевян гиби, афеть бана. Раатлы хем услу уйку вер бана. Аркалайан хем коруйан бени хербир кётюдян Сенин коруйуджу ангелини йолла. Зеря Сянсин бизим джаннарымызын хем гююделеримизин коруйуджусу, хем Сана шюкюр йоллээрыз, Бобайа хем Оола, хем Айоз Духа, шинди хем хожма, хем даймаларын даймаларынада. Аминь

6-джы дуа

Ей Сааби, бизим Аллахымыз, Ангысына биз инанэрыз, хем Ангысынын адыны хербир адтан таа чок чаарэрыз, вер бизя, уйкуйа гиденнеря, джан хем гююдя илинниини хем кору бизи дюртюлмедик хербирнеет гютмесиндян хем диил пак хавезленмектян. Запеть хавезленмеклерин хызланмасыны, сюндюр гююдя калкынмасынын атешини. Вер бизя йашайалым бютюнфикирли ишлердя хем лафларда, ки гечиреряк ииликли йашамайы, калмайалым Сендян аданма ииликлерсиз, зеря иисёзлюйсюн даймаларада. Аминь.

7-джи дуа, айоз Иоанн Златоустун (24 дуа, геджя хем гюн саатларын сайысына гёря)

1.Ей Сааби, Сенин гёктеки ииликлеринсиз бракма бени. 2.Ей Сааби, даймалы зеетлердян куртар бени. 3.Ей Сааби, лафлан, йада ишлян, аклымда йада фикиримдя гюнах еттим – афет бени. 4.Ей Сааби, хербир билмезликтян хем унудулмалыктан, хем аджыйанныксызлыктан, хем юрек четинниин дуйгусузлуундан куртар бени. 5. Ей Сааби, куртар бени хербир денемектян. 6.Ей Сааби, кётю истедиимнян каранныкланан беним юрееми шавкландыр. 7. Ей Сааби, бян ниджя инсан, гюнах еттим, ама Сян, аджыйан Аллах гиби, хайырла бени, гёрерякбеним джанымын куветсизлиини. 8.Ей Сааби, йолла бана йардыма Сенин ииликвермени, ки салтанатлансын бендя Сенин айоз адын. 9.Ей Сааби,Иисус Христос, йаз бени, Сенин изметкерини , ёмюр кийадына хем вер бана ииликли ёлюм. 10.Ей Сааби, беним Аллахым, макаркийапмадым да бишей Сенин ёнюндяии, ама вер бана Сенин ииликвермяннян койайымии башланты. 11.Ей Сааби, Сенин ииликверменин чии дюшмесииндир беним юреемя. 12.Ей гёкюн хем ерин Саабиси, ан бени, Сенин гюнахкер, мындар хем диил пак изметкерини, Сенин Падишахлыында. Аминь.

1.Ей Сааби, пишманныкта каблет бени. 2.Ей Сааби, бракма бени 3.Ей Сааби, гирдирмя бени денемейя. 4.Ей Сааби, вер бана ии дюшюнмяк. 5.Ей Сааби, вер бана йаш хем ёлюмю аклымда тутмак. 6.Ей Сааби, вер бана гюнахларымы ачмаа фикир. 7.Ей Сааби, вер бана услулук, бютюн фикирлик хем сеслемяк. 8.Ей Сааби, вер бана сабур, болчанлык хем услулук. 9.Ей Сааби, ерлештир беним юреемдя ииликлерин кёкюню, - Сенин коркуну. 10.Ей Сааби, йакышыкла бени, севейим Сени бютюн канымдан хем фикиримдян хем йапэим хербир уста Сенин истедиини. 11.Ей Сааби, кору бени кётю инсаннардан, хем шейтаннардан, хем гюнахлы зеетленмеклердян., 12. Ей Сааби, ниджя билерсин, ниджя йапэрсын, хем ниджя изин верерсин – ко олсун Сенин истедиин бендя да, гюнахкердя, зеря иисёзлюйсюн даймаларада. Аминь.

8-джи дуа, бизим Саабимизя Иисус Христоса

Ей , Сааби Иисус Христос, Аллахын Оолу, Сенин чок хатырлы Ананын хем гююдесиз ангеллерин, Сенин пророонун хем Ёнюндягиденин, хем Ваатиз Едеджинин, аллахлысёзлю апостолларын, айдынныклы хем енсемяк ташыйан зеетчекеннерин, Аллаха бензеян хемАллахы ташыйан бобаларын, хем хепси айозларын дуалары ичин куртар бени шиндики шейтан долайламасындан. Ей, беним Саабим хем Йарадыджым, Ани истямеерсин гюнахкеря ёлюм, ама ки о дёнсюн да йашасын, вер бана да, мутсуза хем йакышыксыза, дёнмяк, чыкар бени кайбедян йыланын аазындан, ани истеер йутмаа бени хем дири индирмяя джендемя. Ей Саабим, беним Иилендириджим, Ани беним, мутсуз, ичин чюрюйян гююдейя теннедин, куртар бени мутсузлуктан хем ииленмяк вер беним йоксул джаныма. Кой беним юреемя йапайым Сенин сымарламаларыны хем беним йоксул джаныма. Кой беним юреемя, йапайым Сенин и сымарламаларыны хем бракайым кётю ишлери, хем кабледейим Сенин мутлулукларыны, зеря Сана, ей, Сааби, имут едерим, куртар бени.

9-джу дуа, айоз Студийалы Петринин, Панаийаа

Сана, Аллахын Пекпак Анасы, бян, мутсуз, дюшеряк, дуа едерим: билерсин, Падишахка, ани дурмаксыз гюнахедеерим хем юфкелендирерим Сенин Оолуну хем беним Аллахымы, хем дурмаксыз гюнах едерим хем юфкелендирерим Сенин Оолуну хем беним Аллахымы, пишман олэрым, титирейеряк, артык кайбетмейеджек ми бени Сааби, хем тездя геня хеп ёля йапэрым Сана, Запчыйкам беним, Аллахыдуудуран, билеряк буну , хайырлайасын, каавилейясин хем ююредясин бени иилик йапмаа. Зеря билерсин Запчийкам, беним Аллахыдуудуран, ани азутмеерим беним кётю ишлеримдян хем бютюн фикиримнян северим беним Аллахымын канонуну, ама билмеерим, Пекпак Запчыйкам, нечин ону, недян азетмеерим, северим, ама иилии йапмээрым. Ей, Пекпак, бракма таманнансын беним истедиим, зеря диилдирь йакышыклы, ама ко олсун Сенин Оолунун хем беним Аллахымын истедии; ко куртарсын бени хем акылландырсын, хем версин Айоз Духун берекетени, ки шиндян сора бракайым кётюлюк йапмаа хем калан вакыды йашайай ым Онун сымарламаларына гёря, Ангысына дюшер хербир салтанат, хатыр хем девлет башлантысыз Онун Бобасыннан хем Джюмледянайоз, хем Ии, хем Ёмюрверян ОнунДухуннан барабар шинди хем хожма хем даймаларын даймаларынада. Аминь.

10-джу дуа, Панаийаа

Ииликли Падишахын Ииликли Анасы, Пекпак хем Иисёзлю Аллахыдуудуран Мария, Сенин Оолунун хем бизим Аллахымызын хайырыны дёк беним зеетленян джаныма хем Сенин дуаларыннан доорут бени ии йаптыклара, ки беним ёмюрюмюн калан вакыдыны кусурсуз гечирейим хем Сендян ашыры дженнет булайым, бир Пак хем Иисёзлю Аллахыдуудуран Кыз.

11-джи дуа, айоз коруджу Ангеля

Ей, Христосун ангели, беним айоз кооруйуджум хем беним джанымын хем гююдемин ёртюджюсю, афеть бана хепсини, не гюнах еттим бу гюндя хем бана каршы гидян душманын хербир кётюлююндян куртар бени, ки бир да гюнахлан гюджендирмеийим беним Аллахымы. Ама дуа ет беним ичин, гюнахкер хем йакышыксыз изметкерин ичин, ки гёстерясин бени уйгун Джюмнедянайоз Ючлюнюн, хем беним Саабимин Иисус Христосун Анасыны, хем хепси Айозларын иилииня хем хайырына. Аминь.

Панаийаа кондак

Сана, Енсемяз Аскербашына, кётюлердян куртулан Сенин изметкерлерин енсемяк хем шюкюр етмяк чалгыларыны йоллээрыз, Аллахыдуудуран, Ани Сян, Ангысында вар енсемяз кувет, хербир беладан куртар бизи, ки ююсек сеседелим Сана: «Севин, ей, Гелинниксиз Гелин!»

Чок хатырлы Даймакыз, Христос Аллахын Анасы, гётюр бизим дуаларымызы Сенин Оолуна хем бизим Аллахымыза, ки Сенин дуаларыннан куртарсын бизим джаннарымызы.

Бютюн умудуму Сана койэрым, Аллахын Анасы, Сенин ёртюнюн алтында кору бени

Ей Аллахыдуудуран Кыз, бракма бени, Сендян йардым хем корумак беклейян гюнахкери, зеря Сана умут едер беним джаным, хем хайырла бени.

Айоз Иоанникийин дуасы

Беним умудум – Боба, беним корунтум – Оол, беним ёртюм – Айоз Дух; Айоз Ючлю, шюкюр Сана.

Айоз Дамаскин Иоаннын дуасы

Ей Инсаесевян Запчы, аджаба бу дёшек бана мезар мы оладжек, оса таа айдыннададжан мы беним мутсуз джанымы сабаакы гюнюн шафкыннан? Те, мезар беним нюмдя, те ёлюм дерэр каршымда. Сенин даавандан хем биткисиз зееттян коркэрым, ей Сааби, ама феналык йапмаа вазгечмеерим, Сени, беним Саабими хем Аллахымы, хем Сенин пек пак Ананы, хем хепси Гёктеки куветлери хем айоз ангели, беним коруйуджуму, херкеря гюджендирерим. Билерим, ей Сааби, ани диилим йикышыклы Сенин инсансевменя, ама йакышыклыйым хербир даавайа хем зеетя. Ама, ей Сааби, истеерим, йада истямеерим, куртар бени. Чюнкю еер дооруйу куртарырсан, йок бишей бююк, хем еер пак оланы хайырларсан, йок бишей шашыладжек, зеря оннар йакышыклы Сенин хайырына. Ама бендя, гюнахкердя, хошлу ачыкла Сенин хайырыны, бунда гёстер Сенин инсансевмени, ки юстелямесин беним кётюлююм Сенин йаздырылмаз иилиини хем аджыйанныыны, хем ниджя Сян истеерсин, доорут беним куртулмамы.

Тропарляр, 2-джи сес

Ей, Христос Аллах, айдыннат беним гёзлерими, ки уйумайым ёлюм уйкусуннан, ки демесин беним душманым: юстеледим ону.

Шюкюр: Ей Аллах, ол джаныма аркалайыджы, зеря чок капан арасында гезерим; кору бени оннардан, Ииликли, хем Инсансевян гиби, куртар бени.

Хем шинди: Аллахын пек салтанатлы Анасыны хем айоз ангеллердян таа айозлуйу, сусмаксыз метинненейелим юректян хем ааздан, ачык инанедеряк Ону Аллахыдуудураны, зеря аслы дуудурду бизя тенненмиш Аллахы хем дурмаксыз дуа едер бизим джаннарымыз ичин.

Нышанна кендини Ставрозлан хем сёля Айоз Ставроза дуайы

Ко дирилсин Аллах, да даалсын Онун душманнары, хем ко качсын Онун юзюндян Ондан азетмейенняр. Ниджя кайбелер тютюн, ко кайбелсинняр; ниджя мум ерийер атешин ёнюндя, ёля ко йок олсун шейтаннар оннарын юзюндян, ким Аллахы север хем стауврозлан нышаннанэр, хем севинмяклян деер: «Севин, Саабинин Чокикрамны хем Ёмюрверян Ставрозу, ани шейтаннары коолээрсын Сендя герилян бизим Саабимизин Иисус Христосун кувединнян, Ангысы джендемя инди хем шейтанын куведини йыкты, хем верди бизя Сени, Кенди Икрамлы Ставрозуну, хербир душманы кооламаа дейни». Ей, Чоксайгылы хем Ёмюрверян Саабинин Ставрозу! Йардым ет бана айоз Запчыйкайлан, Аллахыдуудуран Кызлан, хем хепси айозларлан барабар даймаларадак. Аминь.

Йада кысадан

Ей Сааби, аулла бени Сенин Айоз хем Ёмюрверян Ставрозунун кувединнян, хем коору бени хербир феналыктан.

Дуа

Ей, Аллах, илиннет, брак, афет бизим истямейян гюнахларымызы, ани лафлан, ани ишлян, ани билмяклян хем бильмемяклян, ани гюндюз хем геджя, ани фикирлян хем неетлян йаптык: хепсини бизя афет, Ии хем Инсансевян гиби.

Дуа

Ей Инсансевян Сааби, биздян азетмейеннери хем бизи гюджендиреннери афеть. Иилик йапаннара йап иилик. Бизим кардашларымыза хем сойларымыза вер истедиклериня гёря, не куртулуша гётюрер, хем даймалы ёмюр. Хасалыкта оланнары долаш хем вер алышмак. Суда юзеннери доорут. Йолда оланнара ол йолджу. Бизя измет еденнеря хем хайырлы оланнара гюнахларын аф олмасыны баашла. Бизя, йакышыксызлара, оннар ичин дуа етмяя сымарлайаннары хайырла Сенин бююк хайырына гёря. Ан, ей Сааби, таа илери гечинян бизим бобаларымызы хем кардашларымызы хем раатландыр оннары, нередя шылеер Сенин юзюнюн шафкы. Ан, ей Сааби, есирликтя олан бизим кардашларымызы хем хербир беладан куртар оннары. Ан, ей Сааби, берекет гетиреннери хем иилик йапаннары Сенин айоз клисендя хем вер оннарын истедиклериня гёря, не куртулуша гётюрер, хем даймалы ёмюр. Ан, ей Сааби, бизи да, алчак конулу хем гюнахкер, хем йакышыксыз Сенин изметкерлерини, хем шафкландыр бизим аклымызы Сени танымак шафкыннан, хем доорутбизи Сенин сымарламаларынын йолуна, бизим Пекпак Запчыйкамызын, Аллахыдуудуран хем Даймакыз Марийанын, хем хепси Сенин айозларын дуаларыннан, зеря иисёзлюйсюн даймаларын даймаларынада. Аминь.

Гюнахларын хергюнкю ачмасы

Ачэрым Сана, беним Сааби Аллахыма хем Йарадыджыма, Айоз Ючлюдя Бир Олана, салтанат хем башиилтмяк кабледян Бобайа хем Оола, хем Айоз Духа хепси беним гюнахларымы, ани йаптым беними ёмюрюмюн хепси гюннериндя, хем хер саатта, хем шиндики вакытта, хем гечян гюннердя хем геджелердя ишлян, лафлан, фикирлян, чок имяклян, сарфошлуклан, саклы имяклян, бошуна лафетмяклян, дарсыклыклан, хайлазлыклан, каршылафетмяклян, сеслямемезликлян, амазламаклан, маана булмаклан, чалышмамазлыклан, кендими севмяклян, тамахлыклан, капмаклан, йаланнан, кяр севмяклян, диил доору казанчлан, кысканчлыклан, чок гёрмяклян, юфкяйлян, феналыы аклымда тутмаклан, кин гютмяклян, пара севмяклян хем хепси беним дуйгуларымнан: гёрмяклян, ишитмяклян, кокуйлан, датлан, дийимнян, хем башка беним джан хем гююдя гюнахларыннан, ангыларыннан Сени, беним Аллахымы юфкелендирдим, хем йакындакымы беним гюджендирдим. Буннар ичин, пишман оларак, Сенин, беним Аллахымын ёнюндя каббатлы олэрым, хем пишман олмаа истеерим. Ама саде йардым еть бана ей Сааби, беним Аллахым, йашларлан услу йалварэрым Сана; гечтеки са беним гюнахларымы афеть Сенин хайырына гёря, хем бошандыр хепси буннардан, ани сёледим Сенин ёнюндя, Ии хем Инсансевян гиби.

Уйкуйа гидеджейкана сёля:

Ей Сааби Иисус Христос, беним Аллахым, Сенин елиня верерим беним духуму. Сян да бени иисёзля, Сян хайырла, бени, хем даймалы ёмюр вер бана. Аминь