"ГАГАУЗИЯ ПРАВОСЛАВНАЯ". Церковный сайт из Конгаза

(В12) Священное Писание

5

Иисусун проповеди байырда. Мутлулуклаар.

1 Инсан калабалыыны гёрдююнян, Иисус байыр юстюня пинди; хем отурунджа, Она йаклашты учениклери. 2 Да чекетти О лафетмяя хем бутюрлю ююретмяя:

• 3 «Мутлу духлан фукааралар, зеря Гёклерин Падишахлыы оннарындыр.
• 4 Мутлу аалайаннар, зеря оннаар раатлык буладжаклар.
• 5 Мутлу услулар, зеря оннар ер мерасы еденеджекляр.
• 6 Мутлу аач хем сусуз оланнар доорулук ичин, зеря оннар дойунаджаклар.
• 7 Мутлу хайырлылаар, зеря оннар хайыр гёреджекляр.
• 8 Мутлу пак юреклиляр, зеря оннар Аллахы гореджекляр.
• 9 Мутлу баарыштырыджылар, зеря оннар Аллахын евлатлары дениледжекляр.
• 10 Мутлу доорулук ичин кооланмышлар, зеря Гёк Падишахлыы оннарын оладжэк!
• 11 Мутлуйсунуз, ачан сизи азарлайджаклар хем коолайджаклар, хем хертюрлю кётю лаф йаландырып сизя сёлейджекляр Беним адым ичин.
• 12 Севинин хем шенненин, зере гёклердя сизин баашышыныз бююктюр. Хеп ёля коолардылар пророклары да сиздян илери.

Ерин тузу хем дюнеинь шавкы

13 Сиз ерин тузуйсунуз. Еер туз кайбедярса дадыны, несой ону тузлу йапмаа енидян? Озаман о бишейя йарамаз. Калэр саде ону сыбытмаа хем чиинемяя. 14 Сиз варсыныз дуннеин шавкы. Касабайы, ани байыр юстюндя, йок насыл сакламаа. 15 Шавкы йактыйнан, кап алтына коймерлар, ама койерлар гёрюмлю еря, ки шавк етсин хепсиня ким ичердя. 16 Хеп ёля сизин да шавкыныз шавк етсин инсаннара, ки оннар гёрюп сизин ии ишлеринизи, метиннесинняр сизин Гёктеки Бобанызы.

Иисус хем Закон

17 Дюшюнмеин, ани Бян гелдим бозмаа закону хем пророклары. Гелмедим бозмаа, ама гелдим таманнамаа. 18 Зеря доору сёлеерим сизя: гёклян ер гечип гитмедяян, хич бир нокта, бир да чизги Закондан гечмяз, хепси таманнанмаинджа. 19 Ёля ки, ким бу хен кючюк заповедлерин бирини чиинийджек, да бёля башкасыны да ююредеджек, она денеджек хен кючюк Гёк Падишахлыында. Ама хепси, ким таманнайджэк, хем башкасыны да бёля ююредеджек, она Гёк Падишахлыында хень бююк денеджек. 20 Зеря сизя сёлеерим: еер сизин доорулуунуз динбилгичлерин хем фарисейлерин доорулуундан зеедя олмарса, озаман Гёк Падишахлыына гирмейджениз.

Алтынджы заповедь

21 Ишиттиниз не сёленди евел вакытта инсаннара: Ёлдюрмя. Херкез ким ёлдюреджек, суда кабаатлы. 22 Ама Бян сёлеерим сизя, ани хербири, ким юфкеленер кардашына наафля, кабаатлы суда. Ким деер кардашына: „Рака“ (бош кафалы), о кабаатлы Синедрион судуна , ама ким деер: "ахмак", о кабаатлы джендемин атешиня. 23 Хер гетирярсан курбаныны алтара, да орада аклына гетирярсан, ани кардашын кюсюлю сана, 24 брак алтарын ёнюндя курбаныны, да гит илкин баарыш кардашыннан, сора гел да верь курбаныны.  25 Аннаш душманыннан таа тез, онуннан таа йолда булунаркан, ки душманын вермесин сени судьяя, судья да зынданджыйа, да капамасыннар сени зындана. 26 Доору сёлеерим сана, ани чыкмайаджан орадан, ёдямейинджя битки боорджуну.

Единджи заповедь

27 Ишиттиниз, не сёленди евелляр: „Блуд йапма".  28 Ама Бян деерим сизя: ким бакэр карыйа майыллыклан, юреендя блуд йапэр онуннан.  29 Еер саа гёзюн сени аздырырса, чыкар ону да сыбыт. Таа ии кайбельсинь гююдендя бирь екь, некадар бютюнь гююдянь джендемя сыбыдылсын.  30 Еер саа елин сени аздырырса, кес ону да сыбыт. Таа ии кайбельсинь бир ек гуудендя, некадар бютюнь гююдянь джендемя сыбыдылсын.  31 Хеп ёля сёленмиш: „Ким карысындан айырылеер, версин она айырылмак кийады“.  32 Ама Бан деерим сизя: херкез, ким айырылэр карысындан хайырсызлыктан кааре башка бетеря, верер она колайлык блуд йапсын. Хем херкез, ким евленер коджасындан айырылмыш карыйа, блуд йапэр.

Емин етмяк ичин

33 Хеп оля ишиттиниз, не сёленди евел вакыттан инсаннара: „Йалан емин етмейясинь, ама таманнайасын Аллахын ёнюндя не емин еттин“. 34 Ама Бянь сизя деерим: хич емин етмейин, не гёклян, зера о Аллахын чорбажылык скемнеси,  35 не ерлянь, зера о Аллахын айак скемнеси, не да Иерусалимлен, зере о бююк Падишахын касабасы.  36 Емин етмя башыннан, зере йапамээрсын бир да сачыны кара йада бийаз.  37 Ко олсун сизин лафыныз: „Белли, белли", йок, йок". зере не бундан зееда, о кётюдянь гелер.

Душманнык ичин

38 Ишиттиниз, не сёленди: „Гёз - гёз ичин, диш - диш ичин“. 39 Ама Бян сизя деерим: дурмайын каршы фена йапаннара, ама ким урэр сенин саа йанаана, чевир она сол йанааны да.  40 Ким сениннян суда чыкеер, ки алсын гёлмеени, вер она юсть рубаны да. 41 Зорларсайды биркимсей сени, гидясинь оннан бинь адым, гит ики бин.  42 Йалварана верь, ёдюнчь  истеендянь юзюню чевирме.  43 Ишиттиниз, не сёленди: „Комушуну севь, ама душманындан азетме“.  44 Ама Бян сизя деерим: душманнарынызы севиниз, бетва еденнери иисёзляиниз. Йапын иилик оннара, ким азетмеер сиздян, дуа един оннар ичин, ким гюджендирер хем коолээр сизи,  45 озаман оладжееныз Гёктеки Бобанын ооллары. Зеря О йапэр, ки гюн дуусун ниджя ии оланнара, хеп ола фена оланнара да. Верер йаамур дооруларада, диил дооруларада.  46 Еер севярсайдыныз салт оннары, ким сизи север, озаман не ёдеиш олур сизя? Йапмээр мы буну харччылар да?  47 Еер селям верярсайдыныз саде кардашларыныза, не юстюн иш йапэрсыныз? Хеп бёля йапмеерлар мы йазычникляяр да?  48 0нуштан, олун хеп ёля таман, нижа сизин Гёктеки Бобаныз таман.