"ГАГАУЗИЯ ПРАВОСЛАВНАЯ". Церковный сайт из Конгаза

(В12) Священное Писание

6

Иилик йапмак ичин

1 Бакын, йапмайыныз иилик инсаннарын ёнюндя ююнмяк ичин, зере олмайаджек сизя ёдек Гёктеки Бобаныздан. 2 Ёля ки, ачан йапэрсын бир йардым, ююнмя, нидже йапэрлар икиюзлюляр синагогаларда хем сокакларда, инсан оннары мететсин дейни. Дору сёлерим сизя, оннар шиндян сора каблетти ёдеклерини.   3 Ачан сян иилик йапэрсын, билмесин сол елин, не йапэр саа елин.   4 Сенин иилиин саклы йапылсын, да Бобан, ани гёрер не йапылы саклыда, ёдейеджек сана /ачыкта/.

Дуа ичин

5 Ачан дуа едерсин, олма нидже икиюзлюляр, ангылары беенерлар дуа етмяя айакча синагогалар ичиндя хем сокак кёшелериндя, инсан гёрсюн дейни. Доору сёлеерим сизя, оннар шиндян сора каблетти ёдеклерини.   6 Ама сян, ачан дуа едерсин, гир кенди ичериня, капа капуйу, дуа ет Бобана, ани саклы ердя, да Бобан, ани гёрер не йапылэр саклыда, ёдейеджек сана /ачыкта/.   7 Ачан дуа едерсиниз, сёлямеиниз зеедя лафлар, нидже йапэрлар язычникляр, ангылары санэрлар, ани чок лафлар бетериня ишидилмиш оладжэклар.   8 Бензямеин оннара, зере сизин Бобаныз билер, не лязым сизя таа сиз истямедяян.  9 Те несой лязым дуа едясиниз:

• Ей, гёклердя олан бизим Бобамыз: Ко айозлансын Сенин адын.
• 10 Ко гельсинь Сенин Падишахлыын. Ко олсун Сенин истедиин, хем ердя да нидже гёктя.
• 11 Хергюнкю екмеемизи бизя бу гюн вер.
• 12 Хем баашла бизя бизим борчларымызы, нидже биз да баашлэрыз бизя борчлу оланнара.
• 13 Хем колверме бизи денемейя, ама куртар бизи кётюдян:
• /Зере Сениндир Падишахлык, кувет хем метинник, даймаларын даймаларынада. Аминь./

14 Еер сиз аф едярсайдыныз инсанын кабаатларыны, Гёктеки Бобаныз да аф едеджек сизин кабаатларнызы.   15 Ама еер сиз аф етмярсайдыныз инсанын кабаатларыны, Гёктеки Бобаныз да аф етмейджек сизин кабаатларынызы.

Ооруч ичин

16 Оруч тутаркан, гюдженик дурмайын, нидже икиюзлюляр. Оннар гючлендирерлар юзлерини, ки инсана гёстерилсинняр, ани оруч тутэрлар. Доору сёлерим сизя, ани оннар шиндян сора каблеттиляр ёдеклерини.   17 Ама сян, ачан оруч тутэрсын, йаала башыны хем йыка юзюню,   18 ки гёстерясин кендини ооручлу диил аалемин ёнюндя, ама Бобанын ёнюндя, ани саклыда булунер. Да Бобан, ани гёрер саклылары, сана ёдейджек /ачыкта/.

Зенгинник ичин

19 Топламайын зенгинник бу ер юзюндя, нередя кюф хем моли ийер, хем нередя хырсызлар казып чалэр.   20 Топлайын зенгинник гёктя, нередя моль хем кюф имеер, хем нередя хырсызлар казып чалмэр.   21 Зеря нередя сизин зенгиннииниз, орада юреениз да оладжэк.   22 Гююденин айдынныы - гёз. Еер гёзюн пакса, бютюн гююдян шавклы оладжэк.   23 Ама гёзюн кётюйса, бютюн гююдян да караннык оладжэк. Ёля ки, еер шавк, ани вар сендя, каранныкса, озаман не бююктюрь караннык!   24 Кимсей йок насыл измет етсин ики чорбаджыйа. Зере бирини беенярса, ёбюрюню беенмейеджек. Бириня йарадаарса, ёбюрюня йарадамаз. Йок насыл измет едясиниз хем Аллаха, хем зенгинняя.

Кахырланмайын

25 0нуштан деерим сизя: кахырланмайын йашаманыз ичин, дюшюнмеин, не иеджеениз, не ичеджеениз хем не гиеджеениз гююденизя. Диил ми йашамак таа паалы некадар имяк, хем гююдя таа паалы, некадар руба?   26 Бакын гёк кушларына. Оннар не екер, не бичер, не да амбара топлээр, ама Гёктеки Бобаныз оннары дойурэр. Аджаба диилсиниз ми сиз таа паалы оннардан?   27 Хем ким сиздян, чалышып, вар насыл еклесин баарлем бир ендезя кенди бойуна?   28 Руба ичин не кахырланэрсыныз? Йа бакын, несой бювер кыр замбаклары. Оннар не зааметленер, не докуер.   29 Ама деерим сизя: артык Соломон бютюн донаклыында гиинямеди, нидже оннарын бириси.   30 Ачан Аллах бёля гиидирер кыр отуну, ани бююн вар, ама сабаа атешя сыбыдылыр, аджаба таа чок гиидирямейджек ми сизи, ааз инанджылары?   31 Кахырланмайын хем демеин: „Не ийеджез?“ хем „Не ичеджез?“ еки: „Не гийеджез?“   32 Зере хепсини буннары йазычникляр аарээр. Гёктеки Бобаныз билер, ани хепси буннар лязым сизя.   33 Илкин аарайын Аллахын Падишхлыыны хем Онун дорулууну, да хепси калан ишляр сизя вериледжек.   34 Йаарынкы гюн ичин заамет етмеиниз, зере йаарынкы гюн кенди ичин чалышыр. Хербир гюнюн заамети кендиня етяр.