"ГАГАУЗИЯ ПРАВОСЛАВНАЯ". Церковный сайт из Конгаза

(В12) Священное Писание

7

Мааналамайын биркимсеи

1 Суд кесмеиниз биркимсея, озаман сизя да суд кесилмейеджек.   2 Зере насыл суд кеседжеениз, сизя да ёля суд кесиледжек. Не ёлчюйлян ёлчеджениз, сизя да ёля ёлчюледжек.   3 Хем нечин кардашынын гёзюндя йонгайа бакээрсын, ама кенди гёзюндя казыы гёрмеерсин?   4 Хем насыл сёлейеджян кардашына: „Дур чыкарэйым йонгайы гёзюндян“, ачан сенин гёзюндя казык дурэр?   5 Икиюзлю! илкин чыкар казыы кенди гёзюндян, да сора гёреджян, несой чыкармаа йонгайы кардашынын гёзюндян.   6 Айоз иш кёпеклеря вермейин, хем седефлеринизи домузлара даатмайын, ки чиинямесинняр оннары, сора да дёнюп сизи параламасыннар.

Дуаларын куведи

7 Истяйин, да сизя вериледжек; аарайын, да буладжэныз; капуйа урун, да сизя ачыладжэк.   8 Зеря ким истеер - о еденеер, ким аарээр - о булэр, хем ким капуйа урэр - она ачылэр.   9 Вар мы сизин аранызда ёля адам, ани оолу екмек истярса, версин она таш?   10 Йаки балык истярса, версин она йылан?   11 Ачан сиз, бёля фенайкана, билерсиниз ушакларыныза ии баашыш вермяя, озаман некадар таа чок сизин Гёктеки Бобаныз вереджек ии ишляр оннара, ким Ондан истейеджек!   12 Хем насыл истерсиниз инсан сизиннян гётюрсюн кендини, хеп ёля гётюрюнюз сиз да кендинизи инсаннан, зере бунда дурэр Закон хем пророклар.

Ики йол

13 Гирин кючюк токаттан; зеря бююктюрь токатлар хем генишьтир йол, ангылары кайыба гётюреерлар, да чойу оннардан гидер;   14 ама кючюктюр токат, хем дардыр йол, ани ёмюря гётюреерлар, хем ааз инсан оннары булур.

Фидан танынэр мейваларындан

15 Корунун йаланджы пророклардан, ангылары гелерлар сизя койун рубасыннан, ама ичлериндя паралайан йабанылар.   16 Оннары таныйаджэныз мейваларындан. Аджаба топлэрлар мы юзюм тикендян, йаки инжир чёкелектян?   17 Ёля ки, хербир ии фидан йапэр ии мейва, ама прост фидан йапэр прост мейва.   18 Ии фидан йок насыл йапсын прост мейва. Хеп ёля, прост фидан да йок насыл йапсын ии мейва.   19 Хербир фидан, ани йапмэр ии мейва, кесилер да атеша атылэр.   20 Ёля ки, мейваларындан тaныйаджэныз оннары.  21 Диил хербири, Бана дейян: „Сааби! Сааби!" гиреджек Гёк Падишахлыына, ама салт те о, ким таманнэр Беним Гёктеки Бобамын истедиини.   22 Чойу Бана дейеджекляр о гюндя: „Сааби! Сааби! Сенин адыннан биз пророклук етмедик ми? хем Сенин адыннан кооламадык мы фена духлары? хем Сенин адыннан йапмадык ми чок минуниялар (чудеса)?“   23 Озаман ачыклайаджам оннара: „Бян сизи хич бир кере танымадым; гидин Ёнюмдян, законсузлук йапаннар!“

Ики темел

24 0нуштан хербири, ким ишидер Беним сёзлерими да таманнэр оннары, бензедеджам ону акыллы адама, ани йапты евини таш юстюндя.   25 Йаады йаамур, акты селляр, ести люзгерляр, хем хызландылар евин юстюня, ама о йыкылмады; зере темели таш юстюндяйди.   26 Ама хербири, ким сеслеер Беним бу сёзлерими да таманнамэр оннары, о бензяр есапсыз адама, ани йапты евини кум юстюндя.   27 Йаамур йаады, селляр акты, люзгяр ести да евин юстюня абандылар; ев дюштю, да бир бююк йыкынтылык олду».   28 Иисус лафеттиктян сора, инсан шашарды Онун юретмесиня.   29 Зеря О юредярди оннары ниджя заабитлиолан, ама диил ниджя кийатчылар (книжниклярь) хем фарисейляр.