"ГАГАУЗИЯ ПРАВОСЛАВНАЯ". Церковный сайт из Конгаза

8

(В12) Священное Писание

Лепралы (прокаженный) адамын пакланмасы

1 Ачан Иисус инди байырдан, Онун ардына чок инсан гитти. 2 Да те, йаклашты Она бир лепралы хаста, да баш иилдип деди: «Сааби! еер истярсан, вар насыл бени паклайасын». 3 Иисус, узадып елини, дииди она да деди: «Истеерим, паклан!» Да осаат о пакланды лепрадан. 4 Сора Иисус она деди: «Бак, сёлямя кимсейя, ама гит да кендини попаза гёстер, хем да гетир курбан, ани Моисей сымарладыйды, оннара мартурлук ичин».

Иисус алыштырэр юзбашын изметчисини

5 Ачан Иисус гирди Капернаума, йаклашты Она бир юзбашы, да йалварды: 6 «Сааби! беним изметчим парализат олду, да пек зеетленеер». 7 Иисус деди: «Гидип алыштыраджам ону». 8 Юзбашы деди: «Сааби! бян диилим достоин Сян беним евимя гелясин. Саде бир лаф сёля, да беним измекярым алышаджэк. 9 Зеря бян да заабитлик алтындайым, беним да уурумда вар аскерляр. Ачан бириня деерим: „Гит“, о гидер. Ёбюрюня деерим: „Гел“, о гелер. Чыраама деерим: „Йап бу иши“, о йапэр». 10 Ишидип буну, Иисус шашты, да Онун аардына геленнеря деди: «Аслы сёлерим сизя, ани бютюн Израильдя боля бююк инан булмадым. 11 Хем сёлерим сизя, ани чойу геледжекляр гюндуусундан хем гюнбатысындан, да отураджэклар барабар Авраамлан, Исааклан хем Иаковлан Гёк Падишахлында. 12 Ама Падишахлын ооллары уурадыладжек дышары, караннаа, нередя оладжэк ааламак хем диш гыджыртысы». 13 Хем деди Иисус юзбашына: «Гит, да олсун сенин инанына гёря». Аскер юзбашын изметчиси осаат алышты.

Иисус алыштырэр Петринин кайнанасыны

14 Петринин евиня гелип, Иисус гёрдю онун кайнанасыны, йангындан титирер. 15 Дииди онун елиня, да йангын бракты ону. Кары калкты да башлады измет етмяя Иисуса. 16 Ачан авшам олду, гетирдиляр Она чок инсан, фена духтан зеетленмиш. О саде бир сёзюннян оннардан фена духлары чыкарарды хем хепси хасталары алыштырарды, 17 ки таманнансын, не сёленди пророк Исайадан: «О алды бизим йуфкалыымызы Кенди юстюня, хем ташыды бизим дертлеримизи».

Иисусун излейижилери

18 Ачан Иисус гёрдю йанында чок инсан, сёледи юренджилериня кайыклан гёлюн ёбюр тарафына гечсинняр. 19 Озаман Она йаклашты билгичлердян бири да деди: «Юредиджи, Сенин ардына гидеджам, нерей да Сян гитсян». 20 Иисус джувап етти: «Тилкилерин вар иннери, кушларын вар йувалары, ама Инсан Оолу йок нерей башыны да койсун». 21 Башка бириси юренджилерин  арасындан Она деди: «Сааби, брак илкин гидип бобамы гёмейим». 22 Иисус она деди: «Гел Беним ардыма, хем брак ёлюляр кенди ёлюлерини гёмсюнняр».

Иисус бораны усландырэр

23 Иисус кайык ичиня гирдийнан, юренджиляр да Онун ардына гирдиляр. 24 Да те, гёлдя чекетти ёля бююк далгалык, ани далгалар кайыы гёмярдиляр; ама Иисус уйуйарды. 25 Озаман юренджиляр, йаклашып, уйандырдылар Ону да дедиляр: «Сааби! Кайбелериз, куртар бизи!» 26 Иисус деди оннара: «Нечин бёля коркаксыныз, аз инанджылар?» Сора, калкып, азарлады люзгери хем далгалары, да бирдян бююк услулук олду. 27 Инсаннар, шашып дедиляр: «Кимдир Бу, Ангысыны лузгерляр да, дениз да сеслерлар?»

Иисус коолэр фена духлары

28 Ачан Иисус гечти гёлюн ёбюр тарафына, Гергесин ерлериня, каршылады Ону ики киши, бесноватыйлаар, ангылары мезар пориплериндян чыктылар. Оннар ёля титсийдиляр, ани кимсей гечямярди о йолдан. 29 Оннар чекетти баармаа: «Иисус, Аллахын Оолу, не истерсин биздян? Гелдин бизи вакытсыз зеетлемяя ми?» 30 Оннардан бир тарафта бир бююк сюрю домуз отларды. 31 Фена духлар йалвардылар Иисусу: «Еер уурадарсан бизи, йолла гирелим домуз сюрюсюня». 32 «Гидиниз», - деди Иисус. Оннар, чыкып, гирдиляр домузлар ичиня. Бютюн сюрю, хызланып, дик йамачтан гёл ичиня атлады, да су ичиндя буулду. 33 Домузчулар качтылар касабайа, да аннаттылар хепсиня, не олду бесноватый адамнарлан. 34 Бютюн касабадан инсан чыкты каршы Иисуса; да гёрюп Ону, йалвардылар, ки чыксын оннарын ерлериндян.