"ПРАВОСЛАВНАЯ ГАГАУЗИЯ". Церковный сайт из Конгаза

(В12) Священное Писание

15

Ихтярларын адетлери

Озаман Иерусалимдян фарисейляр хем билгичляр Иисуса гелип дедиляр: 2 «Нечин Сенин юрениджилерин чиинерлар ихтарларын адетлерини? Зеря екмек ийеджейкана йыкамэрлар еллерини». 3 Иисус жувап етти оннара: «нечин сиз да чиинерсиниз Аллахын сымарладыыны сизин адетлеринизин бетериня? 4 Зеря Аллах деди: „Икрамна бобаны хем ананы“ хем „Ким бобасыны йада анасыны кётулейеджек, ёлюмнян джезалы олсун". 5 Ама сиз деерсиниз: „Ким деер анасына йада бобасына: Не ляязымды сана верейим, баашыш Аллаха вердим, 6 о вар ниджя икрамнамасын бобасыны /хем анасыны/“.   Бутюрлю уджузлаттыныз Аллахын сёзюню кенди адетинизлян. 7 Икиюзлюляр! Доору пророклук етти сизин ичин Исайа, ачан деди: 8 „Бу инсан Бени икрамнэр саде аазыннан, ама юреклериннян узак Бендян дурэр. 9 Наафиля Бана баш иилдерлар, зеря адам сымарламакларыны юредерлар, сансыннар ани Аллахын юретмеклери“.

Адамы не мындарлээр?

10 Иисус чаарды инсаны да деди: «Сесляйин да аннайын: 11 Мындарлэр адамы диил о, не гелеер аазына, ама не чыкэр аазындан, о мындарлэр адамы». 12 Озаман Онун юрениджилери йаклашып дедиляр Она: «Билерсин ми, ани бу лафлары ишидип, фарисейляр гуджендиляр? 13 Иисус джувап етти оннара: «Хербир расат, ани диил койулу Беним Гёктеки Бобамдан, кёктян йолунаджэк. 14 Бракын оннары, оннар кёрларын кёр гюдюджюлери. Ачан бир кёр гюдер башка кёёру, оннар икиси да чукур ичиня дюшерлар».   15 Петри лафетти да Она деди: «Ачыкла бизя бу ёрняя». 16 Иисус деди: «Не, сиз да мы ёля зор аннэрсыныз? 17 Аннамэрсыныз мы, ани не гелеер адамын аазына, о гечеер шкембесиня, сора дышары уурадылэр? 18 Ама не адамын аазындан чыкэр, о юректян гелер. Те бу мындарлэр адамы. 19 Зеря юректян чыкэр фена неетляр, ёлдюрмяк, ороспулук, хайырсызлык, хырсызлык, йаланджылык, кётюлемяк.   20 Тя не адамы мындарлэр, ама йыканмадык еллян имяя адамы мындарламаз».

Ханаанны карынын инаны

21 Иисус гитти орадан, узакланды Тир хем Сидон ерлериня.   22 Тя бир кары ханаанныйка гелди Она да башлады баармаа: «Аджы бени, Сааби, Давидин Оолу! Беним кызым титси зеетленер фена духтан».   23 Иисус джувап етмеди бир да лаф. Озаман Онун юрениджилери йаклашып йалвардылар: «Салвер ону, зеря баарэр бизим ардымыза».   24 Иисус джувап етти: «Бян йолланмышым салт Израил миллетин кайып койуннарына». 25 Ама бу кары гелди, баш иилтти да деди: «Сааби, йардым ет бана!»   26 Иисус она джувап етти: «Диил исляя алмаа екмяя ушаклардан да атмаа кёпеклеря».   27 «Ёля, Сааби, ама кёпекляр да ийерлар кырынтылары, ани дюшер чорбаджыларынын софрасындан», - деди кары.   28 Озаман Иисус джувап етти: «О, кары, бююктюр сенин инанын. Олсун, ниджя сян истерсин». Хем осаат онун кызы алышты.

Дёрт бин адам дойурулэр

29 Иисус айырылды орадан да гитти Галилейайа, гёлюн йанына. Пинди бир байыр юстюня да отурду орада.   30 Чок инсан гелди Она орайы. Гетирдиляр кендилериннян топаллары, кёрлары, мутулары, сакатлары хем чок башка хасталары, койдулар оннары Онун айакларына, да О оннары алыштырды.    31 Инсан шашарды, гёрюп ани мутулар лафедерлар, сакатлар алышэрлар, топаллар гезерлар, кёрлар гёрерлар. Онуштан метиннярдиляр Израилин Аллахыны.   32 Иисус топлады юрениджилерини да деди: «Джаным аджыйэр бу инсана, зеря юч гюн дурэрлар йанымда, да йок не исинняр. Истямерим оннары салверейим аач, аники байылмасыннар йолда».   33 Юрениджилери дедиляр: «Нередян алалым букадар екмек бу чол ердя да дойуралым букадар инсан?» 34«Кач екмеениз вар?» - сорду Иисус. «Еди екмек хем биркач балык», - йувап еттиляр оннар. 35 Озаман Иисус сымарлады инсана, отурсуннар еря. 36 Алды еди екмяя хем балыклары, шюкюр етти Аллаха, сора кырып верди юрениджилериня. Оннар да пайеттиляр инсана. 37 Хепси идиляр да дойундулар. Сора топладылар имяк парчаларыны, еди сепет долу. 38 Оннар, ани идиляр, варды дёрт бин адам, карылардан хем ушаклардан кааря.   39 Сонда Иисус бракты инсаны  гитсинняр, Кендиси гирди кайык ичиня да гечти Магдала ерлериня