"ПРАВОСЛАВНАЯ ГАГАУЗИЯ". Церковный сайт из Конгаза

(В12) Священное Писание

16

Нышан истеерлар

1. Фарисейляр хем садукейляр йаклаштылар Иисуса, ки денесинняр Ону, да истедиляр, гёстерсин бир нышан гёктян. 2 Иисус джувап етти оннара: «Ачан авшам олэр сиз деерсиниз: „Исляя хава оладжэк, зеря гёк кырмызы“. 3 Сабаален деерсиниз: „Бююн боран оладжэк, зеря гёк кырмызы хем булутлу. Икиюзлюляр, гёк юзюню танымаа билерсиниз, ама вакытларын нышаннарыны танымэрсыныз? 4 Кётю хем ороспу сенселя истеер бир нышан, ама она верилмейеджек башка нышан, Ионанын нышанындан кааря». Сора, бракып оннары, гитти.

Фарисейлерин хем садукейлерин майасы

5  Ююрениджиляр, гечяркан гёлюн ёбюр тарафына, екмек алмаа унутмуштулар. 6 Иисус ‘деди оннара: «Бакын, корунун фарисейлерин хем садукейлерин майасындан». 7 Ююрениджиляр бири-бирилериннян лафедирдиляр: «Онуштан деер, чюнкю екмек алмадык!» 8 Иисус аннаарды оннарын дюшюнмеклерини да деди: «Аз инанджылар, нечин лафедерсиниз бири-биринизлян, ани йок екмеениз? 9 Хеп таа аннамэрсыныз мы? Аклыныза гетирмерсиниз ми, ниджя беш екмеклян дойурулду беш бин киши? Кач сепет имяк парчалары топладыныз? 10 Хем ниджя еди екмеклян дойурулду дёрт бин киши. Биткидя кач сепет имяк парчалары топладыныз? 11 Несой аннамэрсыныз, ани сёламедим екмек ичин? Ама сёледим, корунасыныз фарисейлерин хем садукейлерин майасындан». 12 Озаман аннадылар, ани деди, корунсуннар диил хамур майасындан, ама фарисейлерин хем садукейлерин ююретмесиндян.

Петри таныйер, ани Иисус вар Христос

13 Иисус гелди Филип Кесарийасы ерлериня, орада сорду ююрениджилериня: «Инсан ниджя сайэр Бени, Адам Оолуну? Кимим Бян, деерлар?» 14 Оннар джувап еттиляр: «Кимиси деер, ани Сян - Иоан Ватизедиджи, башкасы - Илийа, таа башкасы - Иеремийа еки бир башка пророк». 15 «Ама сиз не деерсиниз, кимим Бян?» - сорду оннара Иисус. 16 Симон Петри джувап етти: «Сянсин Христос, дири Аллахын Оолу!» 17 Иисус деди: «Мутлуйсун сян, Симон, Ионанын оолу, зеря буну ачты сана диил тен хем кан, ама Беним Гёктеки Бобам. 18 Бян деерим: сян Петрийсин, хем бу таш юстюндя Бян ерлештиреджам Беним клисеми, да джендемин куведи** ону енсейямейеджек. 19 Сана вереджям Гёк Падишахлыын анатарларыны, да не баалайаджан ердя, о бааланмыш оладжэк гёктя, хем не чёзеджян ердя, о чёзюлмюш оладжэк гёктя».  20 Озаман сыкыдан сымарлады ююрениджилериня сёлямесинняр кимсейя, ани О /Иисус/ Христос.

Иисус хаберлеер ёлюмю хем дирилмеси ичин

21 Бундан сора Иисус башлады ачыкламаа ююрениджилериня, ани О лязым гитсин Иерусалимя, чок зеетленсин аксакаллардан, бююк попазлардан хем билгичлердян, ёлдюрюлсюн да ючюндю гюню дирилсин. 22 Петри алды Ону бир тарафа да башлады таказаламаа: «Аллах корусун Сени, Сааби, бёля бишей разгелмесин Сениннян!» 23 Ама Иисус дёндю да деди Петрийя: «Узаклан Бендян, шейтан! Сян Бана бир кёстексин. Зеря сенин неетлерин диил Аллахтан, ама адамдан».

Несой излейелим Иисусу?

24 Озаман Иисус деди ююрениджилериня: «Ким истер гелсин Беним ардыма, атылсын кенди-кендиндян, алсын ставрозуну да Бени излесин. 25 Зеря ким истер куртармаа йашамасыны, кайбедеджек ону. Ама ким кайбедеджек йашамасыны Беним ичин, о йашамак еденеджек. 26 Не файда оладжэк адама, казансын бютюн дюннейи, ама кенди йашамасыны кайбетсин? Нейя вар насыл адам дииштирсин кенди йашамасыны? 27 Зеря Адам Оолу геледжек Гёктеки Бобасынын метиннииндя Кенди ангиллериннян барабар, да херкезиня ишлериня гёря ёдейеджек. 28 Доору сёлерим сизя, ани кимиси бурада дураннардан ёлмейеджекляр, гёрмейинджя Адам Оолуну, гелиркан Кенди Падишахлыында».