"ПРАВОСЛАВНАЯ ГАГАУЗИЯ". Церковный сайт из Конгаза

(В12) Священное Писание

17

Иисус Христос симасыны дииштирер

1 Алты гюндян сора Иисус алды Петрийи, Иакову хем онун кардашыны, Иоаны, да чыкарды оннары бир ююсек байыра. 2 Орада оннарын ёнюндя О симасыны дииштирди: хем йалабады Онун юзю гюн гиби, хем рубалары олдулар бийаз, ниджя шавк. 3 Да те, гёрюндю оннара Моисей хем Илийа, ангылары лафедярдиляр Иисуслан. 4 Озаман Петри деди: «Сааби! ии бизя бурада: Истярсан, йапалым юч чалмар: бири Сана, бири Моисейя, бири да Илийайа». 5 Сёляркан буну, бир шавклы булут оннары каплады, да булут ичиндян бир сес сёледи: «Бу вар Беним севгили Оолум, Ангысында Беним хошлуум: Ону сесляиниз». 6 Ишидип буну, ююрениджиляр пек корктулар, хем юзюкойу дюштюляр. 7 Иисус йаклашты оннара да деди: «Калкын, хем коркмайын!» 8 Калдырып гёзлерини, оннар гёрмедиляр биркимсейи, Иисустан кааре. 9 Иняркан байырдан, Иисус сымарлады оннара: «Кимсейя сёламеиниз, не гёрдюнюз, таа дирилмейиндже Инсан Оолу ёлюдян». 10 Ююрениджиляр сордулар Она: «Нечин билгичляр деерлар, ани илкин ляязым гелсин Илийа?» 11 Иисус джувап етти оннара: «Аслы, ани Илийа илкин геледжек да ерлештиреджек хепсини. 12 Ама сёлеерим сизя, ани Илийа гелди, ама ону танымадылар, да йаптылар онуннан, не истедиляр. Хеп ёля Инсан Оолу да оннарын елиндян зеетленеджек». 13 Озаман ююрениджиляр аннадылар, ани Иисус сёлеер Иоан Ватизедиджи ичин.

Чоджук фена духтан куртулэр

14 Ачан оннар гелдиляр инсанын йанына, йаклашты Иисуса бир адам, да диз чёкюп Онун ёнюндя, йалварды: 15 «Сааби, аджы беним оолуму, зеря ону кара хасталык чок зеетлеер. Чок сыра дюшер атеш ичиня хем су ичиня. 16 Гетирдим ону Сенин ююрениджилериня, ама оннар алыштырамадылар ону». 17 «Инансыз  хем шашырык сенселя! Некадар вакыт таа сизиннян оладжам? Некадар вакыт дайанаджам сизя? Гетирин ону Бана», - джувап етти Иисус. 18 Иисус азарлады фена духу, да о чоджуктан чыкты. Чожук бирдян саа олду. 19 Озаман ююрениджиляр, йалныз Иисуса йаклашып, сордулар: «Нечин биз чыкарамадык фена духу?» 20 «Сизин инансызлыынызын бетериня, - джувап етти Иисус. - Доору сизя сёлеерим: еер олурса сиздя инан хардал тоому гиби* да дейярсаныз бу байыра: „Дииш бурадан“, о диишеджек. Бишей олмайаджэк, ани сиз йапамайасыныз. 21 Бусой фена духлар чыкэрлар саде дуайлан хем оручлан».

Иисус енидян хаберлеер ёлюмюню хем дирилмесини

22 Ачан оннар барабар Галилейада булунардылар, Иисус деди оннара: «Адам Оолу вериледжек инсан елиня.  23 Ону ёлдюреджекляр, ама ючюнджю гюню дириледжек». Ююрениджиляр чок кахырландылар.

Иисус ёдеер харч Айоз бина ичин

24 Ачан етиштиляр Капернаум касабасына, Айоз бинайа ики драхма топлайаннар, гелип Петрийя, сордулар: «Сизин Ююредиджиниз ёдямеер ми харч?» 25«Ёдеер», - джувап етти Петри. Ачан Петри гирди ичери, Иисус илкин лафетти: «Симон, насыл сян санэрсын, дюння падишахлары кимдян харч хем верги алэрлар? Кенди оолларындан мы оса йабанджылардан мы?» 26 «Йабанджылардан», - джувап етти Петри. Иисус деди: «Озаман чыкэр, ани оолларын йок зорлары ёдесинняр. 27 Ама гюджендирмейелим оннары дейни, гит гёля, ат балык ченгелини. Ал илк балыы, ани тутуладжэк, ач аазыны да буладжан бир статир*. Ал ону да ёдя беним ичин хем кендин ичин».