"ГАГАУЗИЯ ПРАВОСЛАВНАЯ". Церковный сайт из Конгаза

(В12) Священное Писание

18

Ушак гиби олунуз

1 Озаман ююрениджиляр, йаклашып Иисуса, сордулар: "Ким таа бююк Гёк Падишахлыында?" 2 Иисус, чаарып бир ушак, койду ону оннарын арасына, 3 да деди: "Аслы сёлеерим сизя: еер диишилмярсайдыныз, да бу ушак гиби олмарсайдыныз, Гёк Падишахлыына гирмейджениз. 4 Ким алчаклададжек кендини бу ушак гиби, о Гёк Падишахлыында ен бююк оладжэк. 5 Хем ким кабледер бёля  бир ушак Беним адыма, о Бени кабледер. 6 Ама ким алдадарса бирини бу кючюклердян, ани Бени инанэрлар, таа ии оладжейды, еер онун бойнусуна асайдылар бир дермен ташы, да дениздя буулдайдылар.

Кахыр дюнейя алдангачлар ичин

7 Кахыр дуннейя алдангачлардан. Зеря лязым гелсин алдангачлар дюнейя, ама кахыр те о адама, кимин бетериня алдангач гелер. 8 Еер сени алдадарса елин, еки айаан, кес оннары да сыбыт, зеря ёмюря таа ии гирмяя елсиз хем айаксыз, некадар ики еллян хем ики айаклан дивеч атешя сыбыдылмаа. 9 Еер сени гёзюн гюнаха дюшюрярса, чыкар ону да сыбыт, зере таа ии бир гёзлян ёмюря гирмяя, некадар ики гёзлян геенна атешиня сыбыдылмаа.

Кайып койун

10 Бакын, бу кючюклерин бирини алчаклатмайын, зеря сёлерим сизя, ани оннарын Ангеллери гёктя херзаман гёрерлар Беним Гёктеки Бобамын юзюню. 11 Инсан Оолу гелди, аарасын хем куртарсын о кайып оланнары. 12 Не санэрсыныз? Варсайды бир адамын юз койуну, да оннарын бири кайбелярса, бракмайджэк мы о доксан докузу байырларда, да гитмейджек ми аарасын о кайып койуну?   13 Буларсайды, аслы сёлеерим сизя, ани севинеджек онун ичин таа чок, некадар о доксан докуз ичин, ани кайбелмедиляр. 14 Хеп ёля сизин Гёктеки Бобаныз да истямеер, ки бу кючюклердян бириси кайбелсин.

Гюнаха дюшян кардаш

15 Еер сенин кардашын гюнах йапарса сана каршы, гит таказала ону салт сенин хем онун арасында; еер сеслярса сени, сян казандын кардашыны. 16 Ама сеслямярса, ал таа ики - юч киши йанына, ани ки мартурлук етсинняр хербир лафы. I7 Оннары да сеслямярса, сёля клисейя; Еер клисейи да сеслямярса, олсун о сана ниджя пэгын, хем ниджя харччы. 18 Аслы сёлерим сизя: не баалайаджэныз ердя, о бааланмыш оладжэк гёктя, хем не чёзеджениз ердя, о чёзюлмюш оладжэк гёктя. 19 Гене аслы сёлеерим: еер сиздян ики киши кайыл  оларса истемяя бишей бу ердя, озаман не да истярсайдылар, оннара вериледжек Гёктеки Бобамдан. 20 Зеря, нередя ики-юч киши Беним адыма топлу, Бян оннарын арасындайым.

Кач керя аф етмяя кардашы?

21 Озаман Петри, йаклашып Она, сорду: "Сааби! кач керя аф едеим кардашымы, ани бана каршы гунах йапэр? Еди керя ми?" 22 Иисус деди она: "Бян демеерим сана еди керя, ама етмиш керя едишяр. 23 Онуштан Гёк Падишахлыы бензеер бир падишаха, ани истеди чыракларыннан есаплашмаа. 24 Ачан башлады есап йапмаа, гетирдиляр бирисини, ани она борчлуйду он бин талант. 25 Чюнкю йокту нейлян ёдесин дейни, чорбаджы сымарлады, сатсыннар ону, карысыны, ушакларыны хем хепсини, не вар онда, ки борджу ёденсин дейни. 26 Озаман о чырак, еря дюшюп, баш иилтти чорбаджыйа, да йалварды: "Чорбаджы! бекля таа бираз, да бян ёдейджям сана борджуму". 27 Чорбаджынын джаны аджыды о чыраа, да салверди ону, боорджуну да баашлады. 28 Дышары чыктыйнан, о чырак каршы гелди бир кафадарыны, ани борчлуйду она юз динар, да тутуп, чекетти ону буумаа, дееряк: "Ёдя бана не борчлуйсун!" 29 Кафадары, еря дюшюп, йалварды: "Бекля бираз, да, ёдейджам сана бютюн борджуму". 30 Ама о кайыл олмады, да гётюрюп, капады ону зындана, борджуну ёдесин дейни. 31 Кафадарлары, буну гёрюп, пек гюджендиляр, да гидип сёледиляр хепсини чорбаджыйа. 32 Озаман чорбаджы чаарды бу чыраа кендисиня, да деди: "Йарамаз чырак, бян сенин бютюн борджуну баашладым, зеря сян йалвардын дейни. 33 Дюшмярди ми сян да аджыйасын о адамы, ниджя бян сени аджыдым?" 34 Чорбаджы юфкеленди, да верди ону зеетчилерин еллериня, ёдесин бютюн борджуну дейни. 35 Хеп ёля йападжэк Гёктеки Бобам сизя да, еер бютюн юректян аф етмярсайдыныз сизин кардашынызын йанылмакларыны.