(В12) Священное Писание
20
Баа ишчилери ичин пилда
1 Гёк Падишахлыы бензеер бир ев саабисиня, ани чин сабаален чыкты кенди баасына ишчи тутмаа. 2 Аннашып ишчилярлян бир динара гюндя, йоллады оннары баайына. 3 Ючюнджю саатта чыкып, башка хайлак ишчи гёрдю. 4 Оннара да деди: "Сиз да гидин беним баайымда ишлемяя. Не дюшер, ёдейджам сизя". Оннар да гиттиляр. 5 Сора, чыкып саат алтыда хем докузда, хеп ёля йапты. 6 Сонунда, онбиринджи саатта, булду таа хайлак дураннары, да деди оннара: "Нечин хайлак дурэрсыныз бютюн гюн?" 7 Оннар дедиляр: "Бизи кимсей ишя алмады". О деди: "Сиз да гидин беним баайыма, хем не дюшярса, кабледеджениз". 8 Авшамнеен баайын саабиси векилиня деди: "Чаар ишчилери да ёдя, илкин сонунда геленнеря, сора да илкинкилеря". 9 Оннар, ани гелдиляр ишя онбиринджи саатта, каблеттиляр биряр динар. 10 Илкинкиляр дюшюндюляр, ани кабледеджекляр таа чок, ама каблеттиляр хеп биряр динар. 11 Алып парайы, чекеттиляр ев саабисиня мырылданмаа, 12 хем сёленмяя: "Бу биткиляр ишледиляр саде бир саат, биз са бютюн гюнюн зооруну хем кызгынныыны чектик, сян са бизя биртюрлю ёдеерсин". 13 Сааби оннарын бириня деди: "Достум! бян кюстюрмедим сени; аннашмадык мы бир динара? 14 Ал пайыны, да гит; бян бу адама ёдярсам хеп ниджя сана, 15 йок му доорулуум кенди варлыымнан йапайым, не истеерим? Оса иилиими чок му гёрерсин?" 16 Бутакым, биткиляр илк оладжэклар, илкляр да битки; зеря чок чаарылмыш, ама аз айырылмыш.
Иисус ёлюмюню хем дирилмесини хаберлеер ючюнджюляя
17 Иерусалимя гидяркан, Иисус йолда оники ююрениджисини алды бир тарафа, да оннара деди: 18 "Те, биз гирериз Иерусалимя; Инсан Оолуну баш попазлара хем кийатчылара вереджекляр, да оннар суд кеседжекляр ёлдюрмяя Ону, 19 хем вереджекляр Ону пэгыннара, ки азарласыннар, дююсюнняр, хем ставроза герсинняр; ама ючюнджю гюню О дириледжек".
Зеведейлерин истемеси
20 Озаман йаклашты Она Зеведейлерин анасы, оолларыннан барабар, баш иилтти да неся йалварды. 21 О сорду: "не истерсин?" Кары деди: "Изин вер, ки Сенин Падишахлыында беним ики оолум отурсуннар бири Сенин саа тарафында, бири да сол тарафында". 22 Озаман Иисус деди: "Билмерсиниз, не истерсиниз. Вар мы ниджя ичясиниз о чёлмектян, ани Бян ичеджам, хем ватиз оласыныз о ватизликлян, ани Бян оладжам?" Оннар деди: "Вар ниджя". 23 Озаман Иисус сёледи: "Беним чёлмеемдян ичеджениз, хем ватизликлен, ани Бян ватиз олэрым, ватиз оладжэныз, ама изин вермяя отурмаа саа еки сол тарафымда, Беним елимдя диилдир: бу вериледжек Бобамдан, кимя О хазырлады." 24 Ишидип буну, калан он ююрениджи бу ики кардаша юфкелендиляр. 25 Иисус, чаарып оннары, деди: "Сиз билерсиниз, ани халклары кулланэр чорбаджылары, хем заабитлик едеер ёндерджилери. 26 Ама сизин аранызда бёля олмасын. Ким истярса бююк олмаа, о изметкяр олсун каланына. 27 Хем ким истярса илк олмаа, о чырак олсун ёбюрлеря. 28 Зеря Инсан Оолу гелмеди, ки Она измет етсинняр, ама Кенди измет етсин дейни инсана, хем версин джаныны башкалары ичин, ки куртарсын дейни оннары".
Ики кёр Иерихон касабасында
29 Иерихондан чыкаркана, Онун ардына чок инсан гидярди. 30 Да те, ики кёр адам, ани отурардылар йол бойунда, ишиттийнан, ани Иисус гечер орадан, чекеттиляр баармаа: "Сааби, Давидин Оолу, аджы бизи!" 31 Инсан сустурарды оннары, оннарса таа пек баарарды: "Сааби, Давидин Оолу, аджы бизи!" 32 Дуруп, Иисус чаарды оннары да деди: "Не истеерсиниз Бендян?" 33 Оннар деди: "Сааби! Ачылсын бизим гёзлеримиз!" 34 Иисусун джаны аджыды, да дииди оннарын гёзлериня; осаат оннар гёрмяя башладылар, да Иисусун ардына гиттиляр.