(В12) Священное Писание
13
Екиджи ичин пилда
1 О гюню, евдян чыкып, Иисус дениз бойунда отурду. 2 Да топланды Онун йанына ёля чок инсан, ани О бир кайык ичиня пинип, отурду; ама инсан кенарда калды. 3 Хем чок ююретти оннары пилдаларлан, дееряк: «Те чыкты екиджи тоом екмяя. 4 Екяркан, тоомнарын биразы йол бойуна дюштюляр, да кушлар конуп, оннары идиляр. 5 Башкалары дюштю ташлы ерлеря, нередя аз топрак варды; да тез филизлендиляр, зеря топрак диилди дерин. 6 Ачан гюн дууду, оннар сёрпештиляр; да кёклери йок дейни, курудулар. 7 Таа башка тоомнар чалылык ичиня дюштюляр; ачан чалылар бююдю, филизлери буулттулар. 8 Ама калан тоомнар ии топраа дюштюляр, да берекет вердиляр: бириси юз, башкасы алтмыш, таа башкасы отуз катына. 9 Кимдя вар кулак ишитмяя, ко ишитсин». 10 Ююренджиляр, йаклашып Она дедиляр: «Нечин сёлерсин оннара ёрнеклян?» 11 Иисус джувап етти: «Чюнкю сизя верилди, аннайасыныз Гёк Падишахлыын саклылыкларыны, ама оннара верилмеди. 12 Зеря кимдя вар, она таа чок вериледжек, хем зееделенеджек, ама кимдя йок, ондан алынаджэк, нейи да вар. 13 Онун ичин сёлерим оннара ёрнеклян. Зеря оннар бакарак гёрмерлар, сеслейряк ишитмерлар, хем аннамэрлар. 14 Хем таманнанэр оннарда пророк Исайанын сёзлери, ани деди: „Ишидеджениз кулакларынызлан, ама аннамайджэныз. Бакаджэныз гёзлернизлян, ама гёрмейеджениз. 15 Зеря бу халкын юреклери уйвашты, хем кулакларындан аар ишидерлар, хем гёзлерини кападылар, ки гёрмесинняр, кулаклары да ишитмесин, хем юректян аннайамайаджаклар, Бана да дёнмейеджекляр, ки Бян алыштырэйим оннары». 16 Мутлу сизин гёзлериниз, ани гёрерлар, хем кулакларыныз, ани ишидерлар! 17 Доору сёлерим сизя, ани чойу пророклардан хем доору адамнардан истедиляр гёрмяя, не сиз гёрерсиниз, хем ишитмяя, не сиз ишидерсиниз, ама гёрмедиляр хем ишитмедиляр. 18 Сесляйин да аннайын, не аннамасы вар бу ёрняян екиджи ичин. 19 Ким Гёк Падишахлыы ичин сёзю ишидер да аннамээр, она шейтан гелер да тоому онун юреендян чалэр. Буннар о тоомнар, ани дюштюляр йол бойуна. 20 Тоомнар, ани екилмиш ташлык ерлеря, оннар, ким, ишидип сёзю, кабледер севинмяклян, 21 ама кёклешямеерлар хем аз вакыт тутунэрлар. Ачан гелер зорлук, еки кооламак Аллахын сёзю ичин, оннар тез атылэрлар. 22 Тоомнар, екилмиш чалылар ичиня, оннар, ким ишидер сёзю, ама бу заманын кахырлары хем зенгинник алдангачлыы буулдэрлар сёзю, да оннар берекет вермеерлар. 23 Тоомнар, екилмиш ии топраа, оннар, ким, ишидип сёзю аннээр да берекет гетирер: бир тоом юз, башкасы алтмыш, таа башкасы отуз катына».
Пилда боодай хем айырык оту ичин
24 Иисус сёледи оннара таа бир пилда: «Гёк Падишахлыы бензер бир адама, ангысы екти кенди тарласына ии тоом. 25 Ама ачан инсан уйуйарды, гелди онун душманы да екти айырык тоому боодайлар ичиня, сора гитти. 26 Ачан пейдаланды боодай филизлери, да башак салверди, юзя чыкты айырык отлары да. 27 Чыраклар гелдиляр да дедиляр: „Чорбаджы, екмедин ми сян исляя тоомнары сенин тарлана? Нередян чыкты бу айырык отлары?“ 28 О деди оннара: „Буну бир душман йапты“. Озаман чыраклар дедиляр: „Истярсайдын, гиделим да оннары йолалым?“ 29 „Олмаз, зеря йоларкан айырыклары, йолмайасыныз боодайлары да. 30 Бракын барабар бююсюнняр бичмяк вакыдынадан. Бичмяк вакыды дейеджам оракчылара: илкин йолун айырык отларыны, да баалайын оннары демет, атешя йакмаа дейни. Ама боодайы топлайын беним амбарыма“.
Хардал тоому хем хамур майасы
31 Иисус сёледи бир башка пилда: «Гёк Падишахлыы бензер хардал тоомуна, ани адам екер кенди тарласына. 32 Бу тоом, макар, ани таа кючюк хепси тоомнардан, ама ачан бюйер, ешилликлердян таа ююсек, бир аач гиби, олэр ёля, ки кушлар конэрлар онун далларына да йува йапэрлар». 33 Башка бир пилда сёледи: «Гёк Падишахлыы бензер хамур майасына, ани бир кары алды да юч ёлчу ун ичиня койду, да бютюн хамуру кабартты». 34 Иисус хепсини буннары инсана пилдаларлан аннатты, хем пилдасыз оннара сёлямярди, 35 ани ки таманнансын не сёледийди пророк: «Лафедеджам пилдаларлан, дюння курулмасындан саклы ишлери аннададжам».
Айырык тоомун пилдасы ачыкланэр
36 Озаман Иисус инсаны салверип, гирди бир евя. Онун юренджилери йаклашып Она дедиляр: «Ачыкла бизя пилдайы тарлада айырыклар ичин». 37 О деди оннара: «Ии тоому Екян – вар Инсан Оолу. 38 Тарла вар дюння; Ии тоом - Гёк Падишахлыын ооллары. Айырыклар – кётюнюн ооллары. 39 Айырыклары екян душман - вар диавол. Бичинти – дюнейин биткиси. Оракчылар - ангилляр. 40 Ниджя айырык оту йолунэр да атешя атылэр, хеп ёля оладжэк дюнеин биткиси да. 41 Инсан Оолу йоллайджэк Кенди ангиллерини да топлайжэклар Онун Падишахлыындан хепсини, не гюнаха дюшюрер, хем ким кётюлюк йапэр, 42 да атаджэклар оннары атешли фырына, нередя ааламак хем диш гыжыртмасы. 43 Озаман доору оланнар шафк едеджекляр, гюн гиби, Бобанын Падишахлыында. Кимин вар кулаа /ишитмаа дейни/, ко ишитсин!
Саклы хазня хем седеф
44 Гёк Падишахлыы бензер бир хазнейя, ани гёмюлю бир тарлада. Бир адам, ани булэр ону, енидян саклэр, да севинмектян гидип сатэр бютюн варлыыны да о тарлайы сатын алэр. 45 Хем да Гёк Падишахлыы бензеер бир джамбаза, ани аарэр гёзял седеф. 46 Ачан пек паалы седефи булэр, гидер да сатэр, нейи вар, да сатын алэр седефи.
Балык пласасы ичин пилда
47 Хем да Гёк Падишахлыы бензер пласайа, ани салверерлар суйа балык тутмаа дейни, ани тутэр хертюрлю балык. 48 Ачан долэр пласа балыклан, балыкчылар чыкарэрлар кенара да отуруп айырэрлар ии балыклары, ама инмяз балыклары сыбыдэрлар. 49 Хеп ёля оладжэк дюннейин биткисиндя да. Ангилляр айыраджэклар кётюлери дооруларын ичиндян. 50 Кётюлери атаджэклар йанар фырына, нередя оладжэк ааламак хем диш гыджыртысы». 51 «Шинди аннадыныз мы хепси бу ишлери?» - сорду Иисус. «Аннадык», - джувап етти оннар. 52 О деди оннара: «Онуштан хербир билгич, ангысы юренди, не лязым Гёк Падишахлыы ичин, бензер бир ев чорбаджысына, ангысы чыкарэр хазнасындан хем ени, хем ески ишляр».
Назареття инсаннарын инансызлыы
53 Ачан Иисус бу пилдалары битирди аннатмаа, гитти орадан. 54 Гелди Кенди мемлекетиня да башлады юретмяя инсаны синагогада. Инсан шашарды да дейярди: «Нередян Она бу арифлик хем кувет? 55 Диил ми О дюлгерин оолу? Диил ми Онун анасы Мария? Кардашлары Онун Иаков, Иосиф, Симон хем Иуда диил ми? 56 Хем Онун хепси кызкардашлары да диил ми бизим арамызда? Озаман нередян хепси бу ишляр вар Онда?» 57 Бу бетеря Иисус ичин шюпейя дюштюляр. Иисус деди оннара: «Пророк сайгылы олмэр саде кенди мемлекетиндя хем кенди евиндя». 58 Хем оннарын инансызлыы бетериня, орада чок минунийалар йапмады.