"ГАГАУЗИЯ ПРАВОСЛАВНАЯ". Церковный сайт из Конгаза

(В12) Священное Писание

2

Йылдыз билгичлерин баш иилтмеси

1. Ачан Иисус дууду Иудейанын касабасында Вифлеемдя, падишах Иродун вакыдында, гелдиляр Иерусалимя гюндуусундан йылдыз билгичлери, да дедиляр: 2. "Нередя Иудейлерин Падишахы, ани дууду? Зеря биз гёрдюк Онун йылдызыны гюндуусунда, да гелдик Она баш иилтмяя". 3. Ишидип буну, падишах Ирод кахырланды, онуннан биля бютюн Иерусалим да. 4. Топлайып башпопазлары хем кийатчылары, Ирод оннара сорду: "Нередя дюшеер дуусун Христос?" 5. Оннар дедиляр: "Вифлеемдя, Иудейанын касабасында, зеря пророктан йазылы бёля: 6. "Сян, Вифлеем, Иуданын топраа, диилсин таа кючюк Иуданын ёндерджиликлерин арасында, зеря сендян чыкаджэк Ёндерджи, Ангысы гюдеджек Беним инсанымы - Израили". 7. Озаман Ирод саклы чаарды йылдыз билгичлерини, да ююренди, не вакыт пейдаланды йылдыз. 8. Хем йоллады оннары Вифлеемя, дейип: "Гидин да исляя аарайын Ушаа. Ачан буладжэныз, бана хабер верин, ки бян да гидип баш иилдеем Она". 9. Сеслеип Падишахы, оннар гиттиляр. Йылдыз, ани гёрюндюйдю гюндуусунда, оннарын ёнюндя гидярди. Етиштийнан, нередя Ушак булунурду, дурду. 10. Гёрюп, ани йылдыз дургунду, оннар пек севиндиляр. 11. Ев ичиня гирип, гёрдюляр Ушаа анасыннан, Марийайлан, да диз чёкюп, Она баш иилттиляр; ачып хазнелерини, баашладылар Она алтын, гюннюк, хем смирна йаайы. 12. Да дюшлериндя кабул едип хабер, ки Ирода дёнмесинняр геери, башка йолдан гиттиляр мемлекетиня.

Египета качмак

13. Ачан йылдыз билгичлери гиттиляр, Саабидян бир ангел Иосифя дюшюндя гёрюндю да деди: "Калк, ал Ушаа хем Онун Анасыны да кач Египета. Орада дурасын Бян сана сёлеинджя, зеря Ирод ушаа аарайаджэк ёлдюрмяя". 14. Иосиф калкты геджя, алды Ушаа хем Анасыны, да гитти Египета. 15. Орада дурду Ирод ёлюнджя, ки таманнансын не Сааби сёледийди пророклан: "Египеттан Бян чаардым Оолуму".

Ирод ёлдюрер ушаклары

16. Ирод аннады, ани йылдыз билгичлери ону алдаттылар. О юфкеленди, да йоллады аскерини Вифлеемя, ки ёлдюрсюнняр хепси ушаклары ики йашындан ашаа, таман о вакыда гёря, ниджя аннадыйды йылдыз билгичлериндян. 17. Озаман таманнанды, не сёлендийди пророк Иеремийадан, ангысы деер: 18. "Рамада сес ишидилер, аалайыш хем аджы баарыш. Рахиль аалэр кенди ушакларыны, да истямеер хошланмаа, зеря оннар йок".

Египеттан Назаретя гери дёнмяк

19. Ачан Ирод ёлдю, Саабидян бир ангел Египетта Иосифя дюшюндя гелди  20. да деди: "Калк, ал Ушаа хем Анасыны, да гит Израиль топраана, зере ёлдюляр оннар, ани аарардылар Ушаан ёмюрюню алмаа". 21. Иосиф калкты, алды Ушаа Анасыннан, да гитти Израиль топраана. 22. Ама ишидип, ани Иудейада падишахлык едер Архелай, кенди бобасынын, Иродун ериня, коркту орайы гитмяя. Ама дюшюндя хабер кабледип, Галилейа ерлериня гитти. 23. Гелип, ерлешти Назарет касабасында, ки таманнансын не сёленмишти пророклардан, ани Она Назаретли денеджек.

Ачыкламак лафлары

1. Баш иилтмяя - поклониться
2. Башпопазлар - первосвященники
3. Кийатчылар - книжники
4. Ёндержи - вождь
5. Ёндерджилик - воеводство
6. Йылдыз билгичлери - звездочеты, мудрецы

(В12) Священное Писание

1

Иисус Христосун сой сенселеси

1. Иисус Христосун, Давидин Оолунун, хем Авраамын Оолунун сой сенселеси. 2. Авраамдан дууду Исаак; Исаактан дууду Иаков; Иаковдан дууду Иуда хем онун кардашлары; 3. Иудадан дууду Фарес хем Зара, ангыларын анасы Фамар; Фарестян дууду Есром; Есромдан дууду Арам; 4. Арамдан дууду Аминадав; Аминадавдан дууду Наассон; Наассондан дууду Салмон; 5. Салмондан дууду Вооз, ангысынын анасы Раав; Вооздан дууду Овид, ангысынын анасы Руф; Овидтян дууду Иессей. 6. Иессейдян дууду падишах Давид; Давидтян дууду Соломон, Урийанын дулундан; 7. Соломондан дууду Ровоам; Ровоамдан дууду Авийа; Авийадан дууду Аса; 8. Асадан дууду Иосафат; Иосафаттан дууду Иорам; Иорамдан дууду Озийа; 9. 0зийадан дууду Иоафам; Иоафамдан дууду Ахаз; Ахаздан дууду Езекийа; 10. Езекийадан дууду Манассийа; Манассийадан дууду Амон; Амондан дууду Иосийа; 11. Иосийадан дууду Иехонийа хем онун кардашлары, Вавилона гечмяк вакыдында. 12. Вавилона гечтиктян сора, Иехонийадан дууду Салафиил; Салафиилдан дууду Зоровавел; 13. Зоровавелдан дууду Авиуд; Авиудтан дууду Елиаким; Елиакимдян дууду Азор; 14. Азордан дууду Садок; Садоктан дууду Ахим; Ахимдян дууду Елиуд. 15. Елиудтан дууду Елеазар; Елеазардан дууду Матфан; Матфандан дууду Иаков; 16. Иаковдан дууду Иосиф, Марийанын коджасы; Марийадан дууду Иисус, Ангысыны адлерлар Христос. 17. Бутакым, Авраамдан Давидя кадар ондёрт сой; Давидтян Вавилон есирлииня кадар ондёрт сой; Вавилон есирлииндян Христоса кадар хеп ондёрт сой.

Иисус Христосун дуумасы

18. Иисус Христосун дуумасы бёля олду: Онун Анасы, Марийа, Иосифлян йавклу олдуунан, таа биля топланмадаан, аннашылды, ани Марийа Айоз Духтан аарлы калмышты. 19. Онун коджасы, Иосиф, дору адамды, да истямееряк утандырмаа Марийайы, неетленди Ону браамаа саклыдан. 20. Буну дюшюнюркян, Саабинин бир ангелы она дюшюндя гёрюндю, да деди: "Иосиф, Давидин оолу! Коркма Марийайы кендиня кары алмаа, зеря Онун аарлыы Айоз Духтандыр. 21. О бир Оол дуудурдаджэк, да Онун адыны Иисус койасын, нечинки О куртараджэк Кенди инсаннарыны гюнахларындан. 22. Буннар хепси олду, ки таманнансын, не Сааби сёледи пророклан, ангысы деер: 23. "Те кыз аарлы каладжэк, да бир оол дуудурдаджэк, хем Онун адыны койаджаклар Еммануил, ани денилер: Аллах бизимлен". 24. Уйандыынан, Иосиф йапты ёля, нидже Саабинин ангелы сымарлады, да карысыны каблетти. 25. Ама Онуннан бирлешмеди, Марийа дуудурмайынджа Оолуну, хем дуумуш евладын адыны Иисус койду.

Пояснительные слова

1. Аарлык - беременность
2. Адламаа - наименовать
3. Инсан - народ
4. Сой - род
5. Сой сенселя - родословная